ஸ்பாரோ என்னும் வரலாற்று ஆவணக் காப்பக அமைப்பு, ஆர். தியாகராஜன் மற்றும் இமெல்டா பிண்டோ ஆகியோருடன் இணைந்து வழங்கும் இலக்கியப் பரிசு பற்றிய அறிவிப்பு சமீபத்தில் கிட்டியது. 2026 ஆம் வருடத்துக்கான இலக்கியப் பரிசுகள் இலக்கியத்தில் அறிவியல் புனைவுகள் என்ற பிரிவுக்கு வழங்கப்பட்டிருக்கின்றன. இந்திய மொழிகளில் பலவற்றுக்குப் பரிசுகள் வழங்கப்பட்டிருக்கின்றன. 

இவற்றில் தமிழில் அறிவியல் புனைவுகளுக்காகன விருதுகளைப் பெற்றவர்கள்-

• முனைவர் முபீன் சாதிகா
• பானுமதி நடராஜன்
• மாலதி சிவராமகிருஷ்ணன்    மற்றும்
• சுதாகர் கஸ்தூரி. 

இவர்களைத் தவிர, அறிவியல் புனைவு, அறிவியல் தொடர்பு கொள்ளல், மற்றும் அறிவியலை பொதுவில் பரப்புதல் ஆகிய அரிய செயல்களுக்கான விருதுகளைப் பெற்றவர்கள்-

• எம். சர்மிளா தேவி (புனைபெயர் ஈரோட் சர்மிளா) 
• முனைவர் உத்ரா துரைராஜன்
• முனைவர் நாராயணி சுப்ரமணியன்
• முனைவர் E. ஹேமப்ரபா,
• உமாநாத் செல்வன் (புனைபெயர் விழியன்)
• முனைவர் V. தில்லிபாபு
• முனைவர் இரா. நடராசன் (புனைபெயர் ஆயெஷா நடராசன்) 

இவர்களுக்கு சொல்வனம் பத்திரிகையின் வாழ்த்துகள். வரும் காலங்களில் இவர்கள் பணி தொடர்ந்து நடந்து தமிழுக்கு மேன்மேலும் வளங்களை அளிப்பார்கள் என்று எதிர்பார்க்கிறோம். 

குறிப்பாக, பானுமதி நடராஜன் (பானுமதி ந.), மாலதி சிவராமகிருஷ்ணன் மற்றும் கஸ்தூரி சுதாகர் ஆகியோர் சொல்வனம் பத்திரிகைக்குத் தம் படைப்புகளை நல்கி இருப்பவர்கள். இவர்களின் அளிப்புகள் சொல்வனம் பக்கங்களுக்குச் சுவையையும், சிறப்பையும் கொணர்ந்தன. அதற்கு இவர்களுக்கு சொல்வனம் பத்திரிகைக் குழுவினரின் நன்றி உரித்தாகும். 

அறிவியல் சிந்தனையைப் புனைவு மற்றும் அபுனைவுகள் மூலம் வளர்ப்பது ஓர் அருஞ்செயல் என்பதைக் கணித்ததோடு அதற்குரிய கௌரவத்தையும் கொடுக்க முன்வந்த ஸ்பாரோ/ ஆர்.தியாகராஜன் மற்றும் இமெல்டா பிண்டோ ஆகியோருக்கு எங்கள் வாழ்த்துகளும், நன்றியும் உரித்தாகும். 

பதிப்புக் குழு

சொல்வனம் இணையப் பத்திரிகை

அறிவிப்பு

ஸ்பேரோ – ஆர். தியாகராஜன் – இமெல்டா பின்டோ இலக்கிய விருது 2026

(ஸ்ரீராம் குழுமத்தின் நிறுவனர் ஆர். தியாகராஜன் அவர்களால் நிறுவப்பட்டது)

இந்த ஆண்டு விருதுக்காகத் தேர்ந்தெடுக்கப்பட்ட படைப்பாளர்களையும் அவர்களுடைய இலக்கியப் பங்களிப்புகளையும் அறிமுகப்படுத்தும் அறிவிப்பு இது.

விருதின் நோக்கமும் தேர்வுமுறையும்

இந்த ஆண்டுக்கான ஸ்பேரோ – ஆர். தியாகராஜன் இலக்கிய விருது 2025-இல், பெரியவர்களுக்கான தமிழறிவியல் புனைகதைப் படைப்புகளையும், குழந்தைகள் மற்றும் இளைஞர்களுக்கான அறிவியல் புனைகதை, அறிவியல் தொடர்பாடல், அறிவியலைப் பொதுமக்களிடம் கொண்டுசெல்லும் படைப்புகள் ஆகியவற்றையும் மையமாகக் கொண்டு வழங்கப்படுகிறது. குழந்தைகள் மற்றும் இளைஞர்களுக்கான படைப்புகள் தமிழ், மராத்தி, அஸ்ஸாமி ஆகிய மொழிகளில் தேர்ந்தெடுக்கப்பட்டுள்ளன.

பொதுவாக, தமிழில் எழுதும் ஒரு பெண் எழுத்தாளருக்கும் ஓர் ஆண் எழுத்தாளருக்கும், பிற மொழிப் பிரிவில் ஒரு பெண் அல்லது ஆண் எழுத்தாளருக்கும் ஸ்பேரோ இலக்கிய விருதுகள் வழங்கப்படுவது வழக்கம். இம்முறை அந்த நடைமுறையில் மாற்றம் செய்யப்பட்டுள்ளது. பெரியவர்களுக்கான தமிழறிவியல் புனைகதைப் பிரிவில் மூன்று பெண்களும் ஓர் ஆணும் தேர்ந்தெடுக்கப்பட்டுள்ளனர்.

தமிழல்லாத மொழிகளுக்கான பிரிவிலும் வழக்கமான நடைமுறையை மாற்றியுள்ளோம். குழந்தைகள் மற்றும் இளைஞர்களுக்கான அறிவியல் புனைகதை, அறிவியல் தொடர்பாடல், அறிவியலைப் பொதுமக்களிடம் கொண்டுசெல்லும் எழுத்து ஆகியவற்றுக்காகத் தனித்தமிழல்லாத மொழிப் பிரிவை உருவாக்குவதற்குப் பதிலாக, குழந்தைகள் மற்றும் இளைஞர்களுக்கான அறிவியல் புனைகதை என்ற வகையைத் தேர்ந்தெடுத்து, தமிழ், மராத்தி, அஸ்ஸாமி ஆகிய மூன்று மொழிகளிலிருந்தும் படைப்பாளர்களைத் தேர்ந்தெடுத்துள்ளோம். வழக்கமாக ஒன்று அல்லது இரண்டு பேரைத் தேர்ந்தெடுப்பதற்குப் பதிலாக, தமிழில் நான்கு பெண்களையும் மூன்று ஆண்களையும், மராத்தியில் மூன்று பெண்களையும், அஸ்ஸாமியில் ஒரு பெண்ணையும் தேர்ந்தெடுத்துள்ளோம்.

கடந்த ஆண்டுகளில் தமிழுக்கான ஸ்பேரோ நடுவர் குழுவில் டி. ஐ. அரவிந்தன், த. பரமேஸ்வரி, அம்பை ஆகியோர் இடம்பெற்றிருந்தனர். பிற மொழிகளுக்கான மொழி ஆலோசகர்களும் இருந்தனர். ஏப்ரல் மாதத்தில் டி. ஐ. அரவிந்தன் எதிர்பாராத விதமாக மறைந்ததைத் தொடர்ந்து, தமிழுக்கான விருதாளர்களைத் தேர்ந்தெடுக்கும் பொறுப்பை பரமேஸ்வரியும் அம்பையும் ஏற்றுக்கொண்டார்கள்.

மராத்தியில் எழுதும் அறிவியல் புனைகதைப் பெண் எழுத்தாளர்கள் சிலரை ஸ்பேரோ குழுவினர் ஏற்கெனவே அறிந்திருந்தனர். அவர்களில் ஒருவர் கடந்த ஆண்டு நடைபெற்ற எங்கள் எழுத்தாளர் சந்திப்பில் பங்கேற்றிருந்தார். வடகிழக்கு இந்தியாவைச் சேர்ந்த குழந்தைகள் அறிவியல் புனைகதை எழுத்தாளர் ஒருவரையும் அதே சந்திப்புக்கு அழைத்திருந்தார்கள். விருதுக்கான இறுதி முடிவுகளை நடுவர் குழுவின் இரு உறுப்பினர்களான த. பரமேஸ்வரியும் அம்பையும் இணைந்து எடுத்தனர்.

தமிழறிவியல் புனைகதை விருதாளர்கள்

இந்த ஆண்டு விருதுக்குத் தேர்ந்தெடுக்கப்பட்டுள்ளவர்கள்:

• டாக்டர் முபீன் சாதிகா
• பானுமதி நடராஜன்
• மாலதி சிவராமகிருஷ்ணன்
• சுதாகர் கஸ்தூரி

குழந்தைகள் மற்றும் இளைஞர்களுக்கான தமிழ்ப் படைப்புகளுக்காகத் தேர்ந்தெடுக்கப்பட்டவர்கள்:

• எம். சர்மேலா தேவி — ஈரோடு சர்மேலா என்ற புனைப்பெயரில் எழுதுபவர்
• டாக்டர் உத்ரா துரைராஜன்
• டாக்டர் நாராயணி சுப்பிரமணியன்
• டாக்டர் இ. ஹேமபிரபா
• உமாநாத் செல்வன் — விழியன் என்ற புனைப்பெயரில் எழுதுபவர்
• டாக்டர் வி. தில்லிபாபு
• டாக்டர் இரா. நடராசன் — ஆயிஷா நடராசன் என அறியப்படுபவர்

மராத்தி மொழியில் இப்பிரிவுக்குத் தேர்ந்தெடுக்கப்பட்டவர்கள் வர்ஷா கஜேந்திரகட்கர், டாக்டர் மேகாஸ்ரீ தால்வி, ஸ்மிதா போட்னிஸ் ஆகியோர். அஸ்ஸாமிய மொழியில் தேர்ந்தெடுக்கப்பட்டவர் பந்திதா புகான்.

1. டாக்டர் முபீன் சாதிகா

சென்னையைச் சேர்ந்த டாக்டர் முபீன் சாதிகா ஆய்வாளர், எழுத்தாளர், மொழிபெயர்ப்பாளர், பேச்சாளர் எனப் பல தளங்களில் இயங்குபவர். சென்னைப் பல்கலைக்கழகத்தில் ஆங்கில மொழி மற்றும் இலக்கியத்தில் முனைவர் பட்டம் பெற்றவர்.

பொதுவாக அறிவியல் புனைகதை என்று கருதப்படும் எழுத்து வகைக்குள் மட்டும் அவர் தன்னை நிறுத்திக்கொள்வதில்லை. ஊகப் புனைவு, தத்துவம், அவாங்கார்ட் எனப்படும் முன்னோடிப் படைப்பாக்க வகைகள் எனப் பல தளங்களில் எழுதுகிறார். அறிவியல், தத்துவம், குறியியல், புனைகதை ஆகிய நான்கும் தனித்தனியான கூறுகளாக இல்லாமல் ஒன்றையொன்று சார்ந்து இயங்கும் அரிய சந்திப்பில் அவரது எழுத்து உருவாகிறது. அவரது அறிவியல் பார்வை கருவிகள், விண்கலங்கள் ஆகியவற்றுடன் முடிந்துவிடுவதில்லை. உயிரியல், குறியியல் எனப்படும் குறிகளின் அறிவியல், தொழில்நுட்பப் பண்பாடு ஆகியவற்றையும் ஆழமாக ஆராய்கிறது.

அவரது சித்ரபவுரி (2023) நாவல் ஒரு முக்கியமான படைப்பாகக் கொண்டாடப்பட்டது. மனிதப் புலன்களின் செயல்பாடுகள், உயிரியல் மாற்றங்கள், வெளி மற்றும் இடம் சார்ந்த இயல்புக்கு மாறான நிகழ்வுகள் ஆகியவற்றை அவரது உரை விரிவாகக் கையாள்கிறது. கனவுக்கும் மாயத்தோற்றத்துக்கும் இடைப்பட்ட புலனுணர்வு உலகத்தை உருவாக்கும் சர்ரியலிசத் தன்மை கொண்ட கதைசொல்லல் இதில் இடம்பெறுகிறது.

அவரது மாதேஸ்வரி (2024) நாவல், பண்டைய தொன்மங்கள் வெறும் கற்பனைக் கதைகளோ நாட்டுப்புறக் கதைகளோ அல்ல; அவை ஒரு காலத்தில் நிலவிய மேம்பட்ட அறிவியல் புரிதல்களின் உருவகப் பதிவுகளாகவும் இருக்கலாம் என்ற கருத்தை ஆராய்கிறது. ஆழமாக வேரூன்றிய பண்பாட்டு மெய்யியல் நம்பிக்கைகளுக்கும் பிரபஞ்சத்தை ஆளும் இயற்பியல் விதிகளுக்கும் இடையே ஒரு பாலத்தை இந்நாவல் உருவாக்குகிறது. வானியல், காலவெளி, இயற்கை அறிவியல் போன்ற கருத்துகளின் வழியாக இயற்கைக்கு அப்பாற்பட்டதாகக் கருதப்படும் தொன்மங்களை அணுகுவதன் மூலம், பண்டைய இதிகாசங்களை நவீன பகுத்தறிவாளர்களுக்கும் அணுக்கமாக்குகிறது. ஆன்மிக நம்பிக்கைக்கும் அனுபவச் சான்றுகளால் நிறுவப்படும் உண்மைக்கும் இடையே உள்ள மரபுவழி எல்லைகளை இந்நாவல் கேள்விக்குள்ளாக்குகிறது. ஒரே பிரபஞ்ச யதார்த்தத்தை விளக்க முயலும் இரு வேறு மொழிகளாக அறிவியலும் தொன்மங்களும் இருக்கலாம் என்பது அதன் அடிப்படைக் கருத்து.

நூறு புராணங்களின் வாசல் முதல் மற்றும் இரண்டாம் பாகங்கள் (2022, 2023) நூறு மிகச்சிறிய, சோதனை முயற்சியிலான நுண்கதைகளைக் கொண்டவை. சொற்களையும் அவற்றின் பொருள்களையும் கலைத்துப் புதிதாக அமைக்கும் இக்கதைகள், மனித மனம் மொழியை எவ்வாறு பிரித்துப் பகுப்பாய்வு செய்கிறது என்பதைப் பதிவுசெய்யும் அறிவியல் ஆய்வக அறிக்கை போன்ற தோற்றத்தை அளிக்கின்றன. அதே நேரத்தில் நவீன புனைகதைக்குரிய கூர்மையும் அழகும் அவற்றில் திகழ்கின்றன.

கண்ணாடிக் கோட்டை (2024) காலப்பயணம், வேற்றுக்கிரகவாசிகள், மனிதர்களுக்கும் வேற்றுக்கிரகவாசிகளுக்கும் இடையிலான மோதல் ஆகியவற்றை ஆராயும் அறிவியல் புனைகதை நாவல். வெவ்வேறு உயிர்வடிவங்கள் சந்திக்கும்போது ஏற்படும் அனுபவங்களையும் அவை இணைந்து வாழ்வதில் உருவாகும் பதற்றங்களையும் இந்நாவல் ஆராய்கிறது. அறிவியல் கற்பனை, காலத்தில் பயணம் செய்யும் சாத்தியம், மனித மற்றும் வேற்றுக்கிரக நாகரிகங்களின் மோதல் ஆகியவற்றை ஒன்றிணைப்பதன் மூலம் வழக்கமான கதைசொல்லலின் எல்லைகளை விரிவுபடுத்துகிறது. மனிதநிலை, பிறமை, பூமிக்கு அப்பால் உயிர்களின் எதிர்காலம் ஆகிய விரிவான கேள்விகளையும் எழுப்புகிறது.

நவீன கல்வித்துறை மற்றும் இலக்கிய உலகங்களில் டாக்டர் முபீன் சாதிகா பெரிதும் மதிக்கப்படும் ஆளுமை.

2. பானுமதி நடராஜன்

தமிழில் பானுமதி நா. என்ற பெயரில் எழுதும் பானுமதி நடராஜன் வணிகவியலில் முதுகலைப் பட்டம் பெற்றவர். வங்கித்துறையில் பணியாற்றிய அவர், எழுத்தின் மீதான ஆழமான ஆர்வத்துக்காக விருப்ப ஓய்வு பெற்று முழுநேரமாக எழுதத் தொடங்கினார்.

தற்காலத் தமிழ் இலக்கியச் சூழலில் இயங்கிவரும் இவர், அரிதான அறிவியல் கருத்துகளை ஆழமான ஆய்வுகளின் அடிப்படையில் புனைவுச் சிந்தனையுடன் இணைக்கும் செறிவான படைப்புகளை எழுதுகிறார். சைபர்னெட்டிக்ஸ், டிஎன்ஏ மற்றும் புரதங்களை அடிப்படையாகக் கொண்ட உயிர்கணினிகள், முழுமையான மரபணுத் தொகுப்பு உருவாக்கம், கெர் கருந்துளைகள், குவாண்டம் இயற்பியல் போன்ற ஆழ்நிலைத் தொழில்நுட்பத் துறைகள் அவரது எழுத்தில் இடம்பெறுகின்றன.

எதிர்காலத்தில் சாத்தியமாகக்கூடிய இத்தகைய கடினமான அறிவியல் கருத்துகள் மனித உணர்வுநிலை, உளவியல், தத்துவம் ஆகியவற்றுடன் எவ்வாறு சந்திக்கின்றன என்பதைத் தமிழ் புனைகதைகள் மற்றும் கட்டுரைகள் வழியாக ஆராய்கிறார்.

அவரது சிறுகதைத் தொகுப்பின் தலைப்புக் கதையான கல்பலதிகா (2025), விருப்பங்களை நிறைவேற்றும் தொன்மையான கற்பகக் கொடியை மரபணுத் தொழில்நுட்பத்தின் ஓர் உருவகமாகப் பயன்படுத்துகிறது. யதார்த்தங்களை உருவாக்கக்கூடிய மரபணு அடிப்படையிலான தொழில்நுட்ப அமைப்பை இக்கதை கற்பனை செய்கிறது. குவாண்டம் இயற்பியலும் உயிரியல்-டிஜிட்டல் பரிணாமமும் குறித்த அவரது ஈடுபாட்டை இக்கருத்து வெளிப்படுத்துகிறது.

உணர்வுகளைக் கொண்ட ரோபோக்கள் உள்ளிட்ட மேம்பட்ட அறிவியல் கருப்பொருள்களை மையமாகக் கொண்டு அவர் தொடர்ந்து சுவாரசியமான அறிவியல் புனைகதைகளை எழுதிவருகிறார்.

3. மாலதி சிவராமகிருஷ்ணன்

இயற்பியலில் முதுகலைப் பட்டம் பெற்ற மாலதி சிவராமகிருஷ்ணன் பல பள்ளிகளில் ஆசிரியராகப் பணியாற்றியவர். பல கல்லூரிகளில் இயற்பியல் உதவிப் பேராசிரியராகவும் பணிபுரிந்துள்ளார்.

அவரது இரண்டு சிறுகதைத் தொகுப்புகள்:

• இரு புறமும் சுழலும் கடிகாரம் (2022)
• கழுத்து நீண்டு வாய் குறுகிய பாட்டிலுக்குள் ஒரு காடு (2024)

இத்தொகுப்புகளில், இதுவரை அறிவியல் புனைகதை எழுத்தாளர்கள் அதிகம் அணுகாத பல வியப்பூட்டும் கதைகள் இடம்பெற்றுள்ளன.

ஒருவர் தமது அடையாளத்தை மாற்றிக்கொள்வதோ முற்றிலும் வேறொருவராக உருமாறுவதோ அவரது கதைகளில் அன்றாட நிகழ்வுகளைப் போல இயல்பாக நடைபெறுகின்றன. ஒரு கதாபாத்திரம் விளையாட்டு ஒன்றுக்குள் நுழைந்து, தான் யார் என்பதை அறிய முடியாமல் தவித்து, அதிலிருந்து வெளியேற முயலும்போது, தான் ஒரு நீலப்பறவை என்பதை அதிர்ச்சியுடன் உணரக்கூடும்.

அவரது கதைகளில் காலப்பயணம் ஒரு சாதாரண நிகழ்வாக இடம்பெறுகிறது. சுமார் 900 ஆண்டுகளுக்கு முன்பு வாழ்ந்த கணிதவியலாளர் பாஸ்கராச்சாரியாரின் மகளான லீலாவதி, கணிதப் புதிர்களைப் பற்றிய ஒரு கதையில் தோன்றலாம். அவளை மீண்டும் அவளுடைய காலத்துக்கே அனுப்புவது சிக்கலான செயலாக மாறிவிடலாம்.

அவரது இரண்டாவது தொகுப்பில் இடம்பெற்றுள்ள லீலாவதியைத் திருப்பி அனுப்புவது எப்படி? என்ற கதை, வரலாற்றுக் கணிதக் கருத்துகளையும் சமகால மனித உளவியலையும் இயல்பாகப் பிணைக்கிறது. காலம் மற்றும் விதியின் புதிரான தன்மையை ஆழமாக ஆராயும் அறிவியல் புனைகதையாக இது திகழ்கிறது.

வேற்றுக்கிரகக் கூறுகள், அயலான உயிர்வடிவங்கள் போன்றவற்றை ஆராயும் கதைகளும் அவரது படைப்புகளில் உள்ளன. அறியப்படாத ஒன்றை மனிதர்கள் சந்திக்கும்போது ஏற்படும் உளவியல் தாக்கத்தையும் அறிவியல் வியப்பையும் அவை வெளிப்படுத்துகின்றன.

சில கதைகளில் ஒருவர் மற்றொருவருடன் பேசிக்கொண்டிருக்கும்போதே திடீரென மறைந்து, வேறொரு காலத்திலும் இடத்திலும் தோன்றிவிடலாம். கடவுள் என்ற ஓர் ஆளுமையின் கீழ் இயங்கும் பிரபஞ்சத்தில், ஒரு கண்ணும் இரண்டு உணர்கொம்புகளும் கொண்ட குறும்புக்காரக் குழந்தை விளையாடும் விளையாட்டின் பகுதியாக இத்தகைய நிகழ்வுகள் இடம்பெறுகின்றன.

அறிவியல் புனைகதையையும் ஹைப்பர் பிக்ஷன் எனப்படும் மிகைநிலைப் புனைவையும் அவர் வெறும் தொழில்நுட்பக் கூறுகளாக அணுகுவதில்லை. உளவியல் மாற்றங்களையும் இருத்தலியல் உண்மைகளையும் ஆராய்வதற்கான இலக்கியக் கருவிகளாகப் பயன்படுத்துகிறார்.

அவரது கதைகளின் அடியில் சில அடிப்படையான கேள்விகள் இயல்பாகவும் ஆழமாகவும் எழுகின்றன:

• உயிர் என்றால் என்ன?
• விளையாட்டு என்றால் என்ன?
• மரணம் என்றால் என்ன?
• ஒருவரை ஒரு தனிமனிதராக உருவாக்குவது எது?
• நாம் உருவாக்கிக்கொள்ளும் அந்த அடையாளம் உண்மையில் யார்?

புனைவையும் அறிவியல் புனைகதையையும் தனித்துவமான முறையில் கையாள்கிறார் மாலதி. கடினமான அறிவியல் சொற்களையோ அளவுக்கு மீறிய விளக்கங்களையோ நம்பியிருக்காமல், அவரது கதைகள் வெவ்வேறு யதார்த்தங்களுக்கிடையே இயல்பாக நகர்கின்றன. சலிப்பூட்டும் விளக்கங்களிலும் தற்காப்பான வடிவமைப்புகளிலும் சிக்கிக்கொள்ளாமல், யதார்த்தத்தின் பல அடுக்குகளுக்கிடையே அவரது கதைகள் சறுக்கிச் செல்கின்றன.

4. சுதாகர் கஸ்தூரி

ஆய்வகத் தகவலியல் மற்றும் உயிரியல் அறிவியல் மென்பொருள் தீர்வுகள் ஆகிய துறைகளில் பணியாற்றும் சுதாகர் கஸ்தூரி, தற்போது அகரம் டெக்னாலஜீஸ் நிறுவனத்தின் துணைத் தலைவராக உள்ளார்.

தற்காலத் தமிழ் எழுத்தாளரான இவர், அறிவியல் அடிப்படையிலான புனைகதைகளுக்காகப் பெரிதும் அறியப்படுகிறார். அறிவியல் கருத்துகள், வரலாற்று அல்லது புவியியல் மர்மங்கள், தத்துவக் கேள்விகள் ஆகியவற்றை வாசகர்களைக் கவரும் கதைகளாகப் பின்னுவதே அவரது எழுத்தின் சிறப்பு.

அவரது குறிப்பிடத்தக்க நூல்கள்:

• 6174 (2012)
• 7.83 ஹெர்ட்ஸ் (2014)
• டர்மரின் 384 (2016)

6174 மர்மமான ஒரு எண், லெமூரியப் பிரமிடு, இந்தியா மற்றும் மியான்மர் முழுவதும் விரியும் பரபரப்பான அறிவியல் போட்டி ஆகியவற்றை உள்ளடக்கிய பிரபலமான நவீன அறிவியல் புனைகதைத் திரில்லர்.

7.83 ஹெர்ட்ஸ் சுவாரசியமான அறிவியல் கருத்துகளையும் ஆர்வத்தைத் தூண்டும் கதைப்போக்கையும் கொண்ட அறிவியல் புனைகதை.

டர்மரின் 384 அறிவியலைத் தனித்துவமான முறையில் புனைவுக்குள் கொண்டுவருகிறது. ஒருபுறம் இது நிறுவனக் குற்றங்களை மையமாகக் கொண்ட திரில்லராக இயங்குகிறது. மறுபுறம், அறிவியல் வெறும் பின்னணிக் கூறாக இல்லாமல் கதையை முன்னெடுத்துச் செல்லும் முதன்மைச் சக்தியாக அமைகிறது.

மைக்கேல் கிரைட்டன் எழுதிய ஜுராசிக் பார்க், ஆண்ட்ரோமிடா ஸ்ட்ரெய்ன் போன்ற படைப்புகளின் துணைவகையைச் சேர்ந்த தொழில்நுட்பத் திரில்லர் என்று இதனை வகைப்படுத்தலாம். நடைமுறையில் உள்ள தொழில்நுட்பத்தையும் உயிரியலையும் அவற்றின் உச்சக்கட்டச் சாத்தியங்களுக்குத் தள்ளி நாடகீயமான விளைவுகளை உருவாக்குவது இவ்வகையின் தன்மை.

6174 நாவலுக்காக 2013-இல் திருப்பூர் தமிழ்ச் சங்க விருதைப் பெற்றார். அதே ஆண்டில் கலகம் குழுமத்தின் தீலீபன் நினைவு கலை இலக்கிய உலகத் தடம் விருதும் பெற்றார். 7.83 ஹெர்ட்ஸ் நூலுக்காக 2014-இல் வாசகசாலை முதல் ஆண்டு முதல் விருது வழங்கப்பட்டது.

குழந்தைகள் மற்றும் இளைஞர்களுக்கான தமிழ்ப் படைப்பாளர்கள்

5. எம். சர்மேலா தேவி – ஈரோடு சர்மேலா

ஈரோடு சர்மேலா என்ற புனைப்பெயரில் எழுதும் எம். சர்மேலா தேவி, ஈரோட்டிலுள்ள கொங்கு கலை அறிவியல் கல்லூரியின் தமிழ்த் துறையில் உதவிப் பேராசிரியராகப் பணியாற்றுகிறார். குழந்தைகள் மற்றும் இளைஞர்களுக்காகத் தமிழில் கதைகள் எழுதுவதுடன், ஆர்வமிக்க கதைசொல்லியாகவும் விளங்குகிறார்.

சுகுமாரன் தொகுத்து 2025-இல் வெளியான நூறு சிறந்த குழந்தைக் கதைகள் நூலில் இவரது இரண்டு கதைகள் இடம்பெற்றுள்ளன. குழந்தைகள் மற்றும் இளைஞர்களுக்காக இவர் எழுதிய நூல்கள் ஆங்கிலம் உள்ளிட்ட பிற மொழிகளிலும் மொழிபெயர்க்கப்பட்டுள்ளன.

காலநிலை மாற்றம் இயற்கைப் பேரழிவுகளைத் தீவிரப்படுத்தியுள்ள இக்காலத்தில், சுற்றுச்சூழலையும் எஞ்சியிருக்கும் ஆறுகள் மற்றும் நீர்நிலைகளையும் காப்பாற்ற வேண்டிய அவசியத்தை நாம் எதிர்கொள்கிறோம்.

1980-களில் பவானி ஆற்றைக் காப்பாற்றும் இயக்கத்துக்குத் தலைமையேற்று முன்னோடியாகச் செயல்பட்ட டாக்டர் சத்தியசுந்தரியின் உண்மையான வாழ்க்கைப் போராட்டத்தை அடிப்படையாகக் கொண்டு, அந்த ஆற்றைக் காப்பாற்றுவதற்காக நடைபெற்ற போராட்டத்தை ஈரோடு சர்மேலா எழுதியுள்ளார்.

சிறுமுகையில் இயங்கிய சவுத் இந்தியா விஸ்கோஸ் (SIV) ரேயான் தொழிற்சாலையிலிருந்து வெளியேற்றப்பட்ட கழிவுகளால் பவானி ஆறு கருமையாக மாறியிருந்தது. இதனால் உள்ளூர் சூழலமைப்பு, குடிநீரின் தரம், விவசாய நிலங்கள் ஆகியவை கடுமையாகப் பாதிக்கப்பட்டன.

ஈரோடு சர்மேலாவின் வானி (2026) நூல், இந்தப் போராட்டத்தின் வரலாற்றை ஒரு சிறுமிக்கும் அவளுடைய பாட்டியான டாக்டர் சத்தியசுந்தரிக்கும் இடையிலான உரையாடலாக இளம் வாசகர்களுக்கு அறிமுகப்படுத்துகிறது.

பவானி ஆற்றின் வரலாறு, சூழலியல், தற்போதைய சுற்றுச்சூழல் நிலை ஆகியவற்றை இந்நூல் பதிவு செய்கிறது. ஈரோடு மாவட்டத்தின் உயிர்வாழ்வுக்கு ஆதாரமாக விளங்கும் ஆற்றின் முக்கியத்துவத்தையும் எடுத்துரைக்கிறது.

அந்தப் பகுதி எதிர்கொண்ட சுற்றுச்சூழல் சவால்களின் வரலாற்றை வெளிப்படுத்துவதுடன், ஆற்றைக் காப்பாற்றுவதற்காகத் தொடர்ந்து நடைபெறும் சுற்றுச்சூழல் பாதுகாப்பு முயற்சிகளையும் உள்ளூர் இயக்கங்களையும் கௌரவிக்கிறது.

இளம் வாசகர்களுக்காக எழுதப்பட்டுள்ள இந்த நூல், அடுத்த தலைமுறையினரிடம் சுற்றுச்சூழல் விழிப்புணர்வை வளர்ப்பதையும், நீர்வளத்தை நிலைத்த முறையில் நிர்வகிப்பதன் அவசியத்தையும், சுற்றுச்சூழல் சீரழிவைத் தடுப்பதன் அவசரத்தையும் உணர்த்துவதையும் நோக்கமாகக் கொண்டுள்ளது.

6. டாக்டர் நாராயணி சுப்பிரமணியன்

உயிரித் தொழில்நுட்பத்தில் இளநிலைப் பட்டம் பெற்ற டாக்டர் நாராயணி சுப்பிரமணியன், புதுச்சேரிப் பல்கலைக்கழகத்தின் போர்ட் பிளேர் வளாகத்தில் உள்ள கடல்சார் ஆய்வுகள் மற்றும் கடல் உயிரியல் துறையில் ஆராய்ச்சி மாணவராக இருந்தபோது கடல்சார் உயிரியலில் முதுகலைப் பட்டமும் பவளப்பாறை மீன்கள் குறித்த ஆய்வில் முனைவர் பட்டமும் பெற்றார். தற்போது மீன்வள ஆராய்ச்சியில் கவனம் செலுத்துகிறார்.

குழந்தைகள் மற்றும் இளைஞர்களுக்காகத் தமிழில் 15 அறிவியல் நூல்களை எழுதியுள்ளார். அறிவியல் எழுத்துக்காக விருதுகளையும் பெற்றுள்ளார்.

அவரது நூல்களில் சில:

• நிற்பதுவே, நடப்பதுவே, பறப்பதுவே (2015)
• கடலும் மனிதரும் — முதல் மற்றும் இரண்டாம் பாகங்கள் (2022, 2024)
• விலங்குகளும் பாலினமும் (2022)
• சூழலும் பெண்களும் (2023)
• கடலோடு உறவாடு (2023)
• ஆழ்கடல் அதிசயங்கள் (2023)
• ஆழ்கடல் சூழலும் வாழ்விடங்களும் (2023)
• மீன்கள் பாயும் மறிகடல் (2024)
• கடல்சார் சூழலியல் கட்டுரைகள் (2024)

2015-இல் வெளியான நிற்பதுவே, நடப்பதுவே, பறப்பதுவே சுற்றுச்சூழலைப் பற்றிய நூல். நூற்றுக்கணக்கான அரிய விலங்குகளைப் பற்றி இந்நூல் பேசுகிறது. எதிர்காலத்தை நாராயணி போன்றவர்களிடம் ஒப்படைக்கலாம் என்று சில விமர்சகர்கள் கருதும் அளவுக்கு இந்நூல் தாக்கத்தை ஏற்படுத்தியது.

2022-இல் வெளியான விலங்குகளும் பாலினமும், பாலினம் தொடர்பான இயல்பிலேயே அமைந்த குணங்கள், உயிரியல் பண்புகள் எனக் கருதப்படுபவற்றைக் கேள்விக்குள்ளாக்கியது. வெறுப்பை அழித்து அன்பின் விதைகளை விதைத்த அறிவூட்டும் நூலாகப் பலராலும் இது பார்க்கப்பட்டது.

அறிவியலைப் பொதுமக்களுக்கு எளிதில் புரியக்கூடியதாகவும் குழந்தைகளுக்கு மகிழ்ச்சியளிப்பதாகவும் மாற்றுவதில் நாராயணிக்கு மிகுந்த ஆர்வம் உண்டு. மீன்கள் தன்னிடம் பேசுவதாக ஒரு நேர்காணலில் அவர் கூறியுள்ளார். இதுவே அவரைத் தனித்துவமான கடல்சார் உயிரியலாளராக அடையாளப்படுத்துகிறது.

7. டாக்டர் உத்ரா துரைராஜன்

டாக்டர் உத்ரா துரைராஜன் கடந்த 30 ஆண்டுகளாக இளநிலை மாணவர்களுக்கு இயற்பியல் கற்பித்து வருகிறார். சென்னையிலுள்ள டி. ஜி. வைஷ்ணவக் கல்லூரியின் இயற்பியல் துறைக்குத் 17 ஆண்டுகளுக்கும் மேலாகத் தலைமை வகித்து வருகிறார்.

அறிவியலைப் பொதுமக்களிடம் கொண்டுசெல்லுதல், அறிவியல் தொடர்பாடல் ஆகியவற்றில் ஆர்வமுடைய இவர், அறிவியல் கல்வி மக்களைச் சென்றடையாதவரை அது முழுமையடையாது என்று நம்புகிறார்.

ஒவ்வொரு அறிவியல் கண்டுபிடிப்பு, புதிய கண்டுபிடிப்பு, தொழில்நுட்ப வளர்ச்சி ஆகியவற்றின் வரலாற்று மற்றும் புவியியல் பின்னணிகளையும் மாணவர்களுக்குக் கற்பிக்க வேண்டும் என்பது அவரது கருத்து. அப்போதுதான் மாணவர்கள் அறிவியலை ரசிப்பதோடு, அதன் மீது ஆழமான ஆர்வத்தையும் வளர்த்துக்கொள்வார்கள்.

அறிவியலின் மீது நம்பிக்கையுள்ள ஒரு தலைமுறையை உருவாக்க, தாய்மார்களுக்கு அறிவியல் கருத்துகள் குறித்த நம்பிக்கையை ஏற்படுத்த வேண்டும். அறிவியலைக் கற்றுக்கொள்வது தொடர்பான அவர்களுடைய அச்சங்களையும் போக்க வேண்டும். இதற்காக, அறிவியல் அறிவைப் புதுப்பித்துக்கொள்ளும் தொடர்ச்சியான, முறைசாராத வாய்ப்புகள் அதிகரிக்க வேண்டும் என்றும் அறிவியலைப் பொதுமக்களிடம் கொண்டுசெல்லும் பணியில் ஊடகங்களின் பங்கு இன்றியமையாதது என்றும் அவர் கருதுகிறார்.

அகில இந்திய வானொலி உரைகள், எழுத்துகள், அறிவியல் காணொளிகளை எளிய தமிழில் மொழிமாற்றம் செய்தல் ஆகியவற்றின் வழியாகப் பொதுமக்களையும் இளம் மனங்களையும் சென்றடைந்து வருகிறார்.

அறிவியல் தொடர்பாடலாளர், எழுத்தாளர், செயல்வழிக் கற்றலுக்கான ஆசிரியர் பயிற்சியாளர் எனப் பல நிலைகளில் இயங்குகிறார். அனைவரையும் உள்ளடக்கிய கற்றலையும் மாணவர்களின் வேறுபாடுகளுக்கு ஏற்ப கற்பிக்கும் முறைகளையும் ஆதரிக்கிறார்.

இந்தியாவின் பாரம்பரிய அறிவை அறிவியல் மற்றும் தொழில்நுட்பக் கண்ணோட்டத்தில் தமிழ், ஆங்கிலம் ஆகிய இரு மொழிகளிலும் ஆவணப்படுத்தி வருகிறார். பல இந்திய மொழிகளில் அறிவைப் பரப்பும் UGC e-KUMBH திட்டத்தின்கீழ் டிஜிட்டல் மின்னணுவியல் பாடநூலையும் எழுதியுள்ளார். இந்திய விஞ்ஞானிகளின் வாழ்க்கை வரலாறுகள், அணு இயற்பியலை விளக்கும் தமிழ்க் காமிக்ஸ் நூல்கள் ஆகியவற்றையும் எழுதியுள்ளார். இந்தியப் பெண் விஞ்ஞானிகளின் வாழ்க்கை வரலாறுகள் குறித்த 28-க்கும் மேற்பட்ட நூல்களை வெளியிட்டுள்ளார்.

2024 முதல், இந்திய இயற்பியல் ஆசிரியர்கள் சங்கத்தின் (IAPT) தேசிய இளநிலை அறிவியல் தேர்வான NSEJS-இன் தேசிய ஒருங்கிணைப்பாளராகச் செயல்பட்டு வருகிறார். இயற்பியல் கற்பித்தல் மற்றும் கற்றலை மேம்படுத்தும் சக மதிப்பாய்வு இதழான The Journal of Physics Education இதழின் மதிப்பாய்வாளராகவும் உள்ளார்.

லண்டனிலுள்ள உயிர்வேதியியல் சங்கம், நரம்பியல் பன்மைத்தன்மை கொண்ட மாணவர்கள் மற்றும் உடல்ரீதியான சவால்களை எதிர்கொள்ளும் மாணவர்களுக்காக அறிவியலைக் கொண்டுசெல்லும் அவரது Science for ALL திட்டத்துக்கு 2025-ஆம் ஆண்டுக்கான பன்மைத்துவ அறிவியல் மானியத்தை வழங்கியுள்ளது.

8. டாக்டர் இ. ஹேமபிரபா

டாக்டர் இ. ஹேமபிரபா சென்னை ஐ.ஐ.டி.யின் உலோகவியல் மற்றும் பொருட்கள் பொறியியல் துறையில் உதவிப் பேராசிரியராகப் பணியாற்றுகிறார்.

ஆழமான தொழில்நுட்ப ஆராய்ச்சியில் ஈடுபட்டிருக்கும் ஒருவர், அதே நேரத்தில் பொதுவாசகர்களுக்கான குழந்தை இலக்கியத்தையும் தொடர்ந்து எழுதுவது அரிது. இந்த இரு உலகங்களையும் அவர் இயல்பாக இணைக்கிறார். அறிவியல் உண்மைகளைத் துல்லியமாகக் கொண்ட கதைகளின் வழியாக இளம் வாசகர்களிடம் அறிவியல் மனப்பான்மையை வளர்க்கிறார்.

அவரது குழந்தைகள் எப்படி உருவாகிறார்கள் (2021) நூல், குழந்தைகளின் வயதுக்கும் புரிதலுக்கும் ஏற்ற அறிவியல் மற்றும் பெற்றோர் வழிகாட்டல் நூலாகும். குழந்தைகள் அடிக்கடி கேட்கும் “குழந்தைகள் எப்படிப் பிறக்கிறார்கள்?” என்ற கேள்விக்கு நேரடியான, அறிவியல் அடிப்படையிலான பதில்களை வழங்குகிறது. கட்டுக்கதைகளைச் சொல்லாமலும் குழந்தைகளின் இயல்பான ஆர்வத்தை அடக்காமலும் இந்தக் கேள்வியைப் பெற்றோர்கள் இயல்பாகக் கையாள உதவுகிறது.

அறிவுக்கு ஆயிரம் கண்கள்: அன்றாட வாழ்வில் அறிவியல் (2022) அன்றாட நிகழ்வுகளை அடிப்படையாகக் கொண்ட சுவாரசியமான அறிவியல் கட்டுரைகளின் தொகுப்பு. எளிய அன்றாடச் செயல்களை எடுத்துக்கொண்டு, அவற்றைப் பற்றிய ஆர்வத்தைத் தூண்டி, அவற்றின் அடிப்படையில் உள்ள அறிவியலை விளக்குகிறார். பின்னர் அந்த எளிய நிகழ்வுகளைப் பெரிய அளவிலான தொழில்நுட்பப் பயன்பாடுகளுடன் இணைக்கிறார்.

ஹம்போல்ட்: அவர் நேசித்த இயற்கை (2022), பதினெட்டாம் நூற்றாண்டின் புகழ்பெற்ற இயற்கை ஆய்வாளரான அலெக்சாண்டர் வான் ஹம்போல்ட்டின் வாழ்க்கையைச் சொல்லும் அழகிய ஓவியங்களுடன் கூடிய குழந்தைகள் நூல். ஆய்வகத்துக்கு வெளியே அவர் மேற்கொண்ட அறிவியல் சாகசங்களும் இயற்கையைப் பற்றிய மனிதகுலத்தின் புரிதலை அவரது பயணங்கள் எவ்வாறு மாற்றின என்பதும் இதில் பதிவாகியுள்ளன.

முகில்: மேகங்களுக்குப் பெயர் வந்த கதை (2023), பல்வேறு வகையான மேகங்களையும் வானிலை அறிவியல் கருத்துகளையும் அறிமுகப்படுத்தும் குழந்தைகளுக்கான புனைவும் கல்வி நூலும் ஆகும். இதுவும் அழகாகப் படங்களுடன் உருவாக்கப்பட்டுள்ளது.

பல்கலைக்கழக ஆய்வகப் பணிகளுடன், இந்து தமிழ் திசை போன்ற முக்கிய தமிழ் நாளிதழ்களில் அறிவியல் தொடர்பாடல் கட்டுரைகளையும் எழுதிவருகிறார். நோபல் பரிசுகள், ஒரு நாட்டின் வளர்ச்சியில் அறிவியலின் அடிப்படைப் பங்கு போன்ற தலைப்புகளில் அவரது கட்டுரைகள் வாசகர்களிடம் வரவேற்பைப் பெற்றுள்ளன.

சிக்கலான அறிவியல் கருத்துகளை குழந்தைகளுக்கும் பெற்றோர்களுக்கும் எளிதில் புரியக்கூடிய, படைப்பூக்கமுள்ள தமிழ் இலக்கியமாக மாற்றுவதற்குப் பல ஆண்டுகளாகப் பணியாற்றி வருகிறார். எளிய விளக்கங்களுடனும் நுட்பமான நகைச்சுவையுடனும் சிக்கலான அறிவியல் கருத்துகளை அன்றாட வாசகர்களுக்கும் இளைஞர்களுக்கும் புரியவைக்கும் எழுத்தாளராக அறியப்படுகிறார்.

9. உமாநாத் செல்வன் – விழியன்

விழியன் என்ற புனைப்பெயரில் பரவலாக அறியப்படும் உமாநாத் செல்வன், குழந்தை இலக்கிய எழுத்தாளர், கணிதத்தைப் பொதுமக்களிடம் கொண்டுசெல்லும் செயற்பாட்டாளர், செயற்கை நுண்ணறிவுக் கல்வி வடிவமைப்பாளர் எனப் பல தளங்களில் சிறந்து விளங்குகிறார்.

மென்பொருள் துறையில் பணியாற்றிக்கொண்டே, சிக்கலான தர்க்கவியல் கருத்துகளை குழந்தைகளுக்கு எளிதாகவும் மகிழ்ச்சிகரமாகவும் அறிமுகப்படுத்துவதற்குப் பல ஆண்டுகளாக உழைத்து வருகிறார்.

அவர் நடத்தும் தமிழ் உறக்கநேரக் கதை முயற்சி 8,000-க்கும் மேற்பட்ட பெற்றோர்களைச் சென்றடைந்துள்ளது. செய்திப் பரிமாற்றத் தளங்கள் வழியாகப் பெற்றோர்களுக்கு ஒலிக்கதைகளை அனுப்புகிறார். அவர்கள் இரவில் அவற்றைக் குழந்தைகளுக்குப் போட்டுக் காட்டவோ தாங்களே சொல்லவோ செய்கிறார்கள். இந்தக் கதைகள் அனைத்தும் கணிதத்தை நேரடியாக மையமாகக் கொண்டவை அல்ல; சில கதைகள் நுட்பமாகத் தர்க்கச் சிந்தனையை அறிமுகப்படுத்துகின்றன.

குழந்தைகளிடம் எண்கள் குறித்த அச்சத்தைப் போக்குவதே அவரது கணிதப் படைப்புகளின் முக்கிய நோக்கம். வழக்கமான புனைகதைகளை மட்டும் நம்பாமல், சூழலுக்கு ஏற்ற கட்டுரைகள், புதிர்கள், ஊடாடும் செயல்பாடுகள் ஆகியவற்றைப் பயன்படுத்துகிறார்.

60-க்கும் மேற்பட்ட நூல்களை வெளியிட்டுள்ள அவருடைய தேன்கணி (2024), கணித வரலாறு, கருத்துகள், அன்றாடப் பயன்பாடுகள் ஆகியவற்றை எளிய தமிழில் விளக்கும் முக்கியமான நூலாகக் கருதப்படுகிறது.

சரண்யாவுடன் இணைந்து எழுதிய கணிதம் பேசும் அறிவுத்தோட்டம் (2026), இயற்கை மற்றும் உரையாடல் கூறுகளை இணைத்து குழந்தைகளுக்குக் கணிதச் செயல்பாடுகளையும் தர்க்கச் சிந்தனையையும் கற்பிக்கிறது.

சீட்டுக்கட்டில் சிறுவர்களுக்கான கணிதம் (2023), சீட்டாட்டங்களின் வழியாக நிகழ்தகவு, சேர்க்கை வகைகள், எண்ணுதல் ஆகிய கணிதக் கருத்துகளைக் கற்பிக்கிறது.

தமிழ்நாடு முழுவதும் நேரடிப் பயிற்சி வகுப்புகளை நடத்தும் அவர், மனப்பாடக் கல்விக்கு மாற்றாக விளையாட்டுகளின் வழியாகக் கணிதத்தைத் தொட்டுணரவும் காட்சிப்படுத்திப் புரிந்துகொள்ளவும் குழந்தைகளுக்குக் கற்பிக்கிறார்.

23 ஆண்டுகளுக்கும் மேலான மென்பொருள் அனுபவமுள்ள தகவல் தொழில்நுட்ப வல்லுநரான விழியன், தொழில்நுட்பத்தையும் குழந்தைகளின் கல்வியையும் இணைக்கும் செயற்கை நுண்ணறிவுக் கல்வி வடிவமைப்பாளராகச் செயல்படுகிறார்.

அவரது சமீபத்திய நூலான வினயாவும் மினியும் (2026), குழந்தைகளுக்காகத் தமிழில் எழுதப்பட்ட செயற்கை நுண்ணறிவுக் கல்வி நூல். கதாபாத்திரங்களின் வழியாகச் செயற்கை நுண்ணறிவுக் கருத்துகளை அறிமுகப்படுத்துகிறது.

முக்கியமாக, செயற்கை நுண்ணறிவைப் பயன்படுத்துவதோடு நிற்காமல், அது வழங்கும் தகவல்களை விமர்சனபூர்வமாக மதிப்பிடவும் குழந்தைகளுக்குக் கற்பிக்கிறது. ChatGPT-யில் கட்டளைகளை எவ்வாறு தட்டச்சு செய்வது என்பதை மட்டும் கற்பிப்பதில்லை. செயற்கை நுண்ணறிவுத் தரவு மாதிரிகள் என்றால் என்ன, அவை ஏன் தவறான தகவல்களை உருவாக்குகின்றன, கிடைத்த தகவல்களைத் தனியாக எவ்வாறு சரிபார்ப்பது என்பதையும் விளக்குகிறது.

10. டாக்டர் வி. தில்லிபாபு

டாக்டர் தில்லிபாபு விஜயகுமார், பாதுகாப்பு ஆராய்ச்சி மற்றும் மேம்பாட்டு நிறுவனமான DRDO-வின் மூத்த விஞ்ஞானியும் எழுத்தாளரும் ஆவார்.

குழந்தைகள், மாணவர்கள், இளைஞர்கள் ஆகியோர் புதிய கண்டுபிடிப்புகளிலும் அறிவியல் சார்ந்த தொழில்களிலும் ஈடுபடுவதற்கான ஊக்கத்தை அளிக்கும் பல பிரபலமான அறிவியல் மற்றும் தன்னம்பிக்கை நூல்களை எழுதியுள்ளார்.

அவரது குறிப்பிடத்தக்க நூல்கள்:

• ராக்கெட் லாஞ்சரும் கொசுக்கடியும் (2018)
• அடுத்த கலாம்: விஞ்ஞானி ஆகும் வழிகள் (2019)
• வானமும் பூமியும் (2020)

வானமும் பூமியும் நூல் இரண்டு பகுதிகளாக அமைந்துள்ளது. விண்ணும் என்ற பகுதியை அண்ணாதுரை எழுதியுள்ளார்; மண்ணும் என்ற பகுதியில் பூமி மற்றும் பாதுகாப்புத் தொழில்நுட்பம் குறித்து தில்லிபாபு எழுதியுள்ளார்.

இந்த நூல் 2021-ஆம் ஆண்டுக்கான மதிப்புமிக்க மான்வை முஸ்தபா அறிவியல் விருதைப் பெற்றது. இளம் வாசகர்களிடையே பெரும் வரவேற்பைப் பெற்ற சுட்டி விகடன் உள்ளிட்ட தமிழ் இதழ்களிலும் அவர் தொடர்ந்து அறிவியல் கட்டுரைகளை எழுதிவருகிறார்.

11. டாக்டர் இரா. நடராசன் – ஆயிஷா நடராசன்

ஆயிஷா நடராசன் என்ற பெயரால் பிரபலமாக அறியப்படும் டாக்டர் இரா. நடராசன், குழந்தைகளுக்கான நூல்களை எழுதும் புகழ்பெற்ற எழுத்தாளர். தமிழ், ஆங்கிலம் ஆகிய இரு மொழிகளிலும் எழுதுகிறார்.

அவரது Ayesha என்ற குறுநாவல் 12 மொழிகளில் மொழிபெயர்க்கப்பட்டு, பல மில்லியன் பிரதிகள் விற்பனையாகியுள்ளது. 150-க்கும் மேற்பட்ட நூல்களை எழுதியுள்ள இவர், அவற்றில் பெரும்பாலானவற்றை அறிவியல் சார்ந்த தலைப்புகளில் எழுதியுள்ளார். அறிவியல் புனைகதைகளையும் படைத்துள்ளார்.

புதுச்சேரிக்கு அருகிலுள்ள கடலோர நகரமான கடலூரில் உள்ள கிருஷ்ணசாமி நினைவு மெட்ரிக் மேல்நிலைப் பள்ளியின் முதல்வராகப் பணியாற்றுகிறார்.

1982-இல் ஆனந்த விகடன் தமிழ் வார இதழில் கவிதைகள் எழுதுவதன் மூலம் தனது எழுத்துப் பயணத்தைத் தொடங்கினார். பின்னர் குழந்தைகளுக்கான அறிவியல் புனைகதைகளில் ஆர்வம் கொண்டார். இதுவரை 83 நூல்களை எழுதியுள்ளார்; அவற்றில் 72 தமிழிலும் 11 ஆங்கிலத்திலும் வெளிவந்துள்ளன.

அவரது விஞ்ஞான விக்கிரமாதித்யன் கதைகள் (2009), போலியோ தடுப்பூசி, இன்சுலின், மலேரியா தடுப்பூசி போன்ற மருத்துவக் கண்டுபிடிப்புகளின் வரலாற்றை விரிவாக எடுத்துரைக்கிறது.

Scientific Revolution என்ற தலைப்பில் பத்து நூல்களைக் கொண்ட ஆங்கிலத் தொடரையும் வெளியிட்டுள்ளார். கலிலியோ கலிலி, கிரெகர் மெண்டல், மேரி கியூரி, ஆல்பர்ட் ஐன்ஸ்டீன் உள்ளிட்ட பத்து முக்கிய விஞ்ஞானிகளின் வாழ்க்கையை இத்தொடர் அறிமுகப்படுத்துகிறது.

அவரது அறிவியல் புனைகதைகள் காலப்பயணம், கற்பனை, வேளாண் அறிவியல் புனைகதை, கணித அறிவியல் புனைகதை, பயோபங்க், சைபர்பங்க் போன்ற பல துணைவகைகளை உள்ளடக்கியுள்ளன.

சைபர்பங்க் மற்றும் பயோபங்க் ஆகியவை உயர் தொழில்நுட்பம் இருந்தாலும் வாழ்க்கைத் தரம் சீரழிந்திருக்கும் எதிர்காலச் சமூகங்களைச் சித்தரிக்கும் அறிவியல் புனைகதை வகைகள். ஊழல் நிறைந்த பெருநிறுவனங்கள் அல்லது சர்வாதிகார ஆட்சிகளால் கட்டுப்படுத்தப்படும் உலகங்களை இவை ஆராய்கின்றன. சைபர்பங்க் தகவல் தொழில்நுட்பம், டிஜிட்டல் அமைப்புகள் ஆகியவற்றை மையமாகக் கொண்டிருக்க, பயோபங்க் செயற்கை உயிரியல், மரபணுப் பொறியியல், உயிரியல் தொழில்நுட்பங்களைத் தனிநபர்கள் மாற்றியமைத்துப் பயன்படுத்துதல் ஆகியவற்றில் கவனம் செலுத்துகிறது.

அவரது குறிப்பிடத்தக்க படைப்புகள்:

• டார்வின் ஸ்கூல் (2014) — பயோபங்க்
• வந்தே மாதரம் (2016) — காலப்பயணம்
• அமர்த்தியாவின் ஆத்திச்சூடி (2017) — அறிவியல் கற்பனை
• மின்மினி π உலகத்தின் கதை (2022) — கணித அறிவியல் புனைகதை

இவை வாசகர்களிடையே பெரும் வரவேற்பைப் பெற்றுள்ளன.

உடல் தரவு என்ற அவரது படைப்பு வேளாண் அறிவியல் புனைகதை வகையைச் சார்ந்தது. ஐன்ஸ்டீனபுரம் சைபர்பங்க் வகையைச் சேர்ந்தது. இரண்டும் அவரது விரிவான தொகுப்பு நூல்களில் கருப்பொருள் சார்ந்த பகுதிகளாக இடம்பெற்றுள்ளன.

காலநிலை அகதிகள் (2022), தமிழின் முதல் காலநிலைப் புனைகதைப் படைப்பாகக் குறிப்பிடப்படுகிறது.

அவரது சமீபத்திய அறிவியல் புனைகதைத் தொகுப்பான அறிவியல் கதைகள் (2026), 700 பக்கங்களைக் கொண்டுள்ளது. தமிழில் வெளியான மிகப்பெரிய அறிவியல் புனைகதைத் தொகுப்பாக இது அமைந்துள்ளது.

கல்வி ஆய்வாளரும் உளவியலாளருமான இவர், மாற்றுக் கல்வி முறைகளை ஆதரிக்கும் செயற்பாட்டாளராகவும் உள்ளார்.

2017 நவம்பர் 10 முதல் 15 வரை கடலூரில் நடைபெற்ற தேசியக் குழந்தைகள் புத்தகத் திருவிழாவின் தலைமை ஒருங்கிணைப்பாளராகப் பணியாற்றினார். தேசிய புத்தக அறக்கட்டளை, Books for Children, சாகித்திய அகாதெமி ஆகிய அமைப்புகள் இணைந்து நடத்திய இவ்விழாவில் 50,000-க்கும் மேற்பட்ட குழந்தைகள் பங்கேற்றனர்.

தொலைக்காட்சி நிகழ்ச்சிகள், யூடியூப் தளங்கள் ஆகியவற்றில் அறிவியலைப் பொதுமக்களிடம் கொண்டுசெல்லும் பணிக்காகப் பாராட்டப்படும் இவர், பல இதழ்களிலும் நாளிதழ்களிலும் தொடர்ந்து அறிவியல் கட்டுரைகளையும் கதைகளையும் எழுதிவருகிறார்.

அவரது விஞ்ஞான விக்கிரமாதித்யன் கதைகள் (2009) நூலுக்கு, சாகித்திய அகாதெமி வழங்கும் குழந்தை இலக்கியத்துக்கான பால சாகித்திய புரஸ்கார் விருது 2014-இல் கிடைத்தது.

ஆசிரியர்களுக்காக அவர் எழுதிய இது யாருடைய வகுப்பறை? (2013) நூலுக்கு 2015-இல் தமிழ் வளர்ச்சித் துறை விருது வழங்கப்பட்டது.

அண்மையில், பொதுமக்களிடையே அறிவியலைப் பரப்புவதற்காக அவர் ஆற்றிய பங்களிப்பைப் பாராட்டி, குளோபல் எஜுகேஷன் கான்க்ளேவ் அவருக்கு சர்வதேச சிறப்புக் கல்வியாளர் விருதை வழங்கியது.

மராத்தி மொழிப் படைப்பாளர்கள்

12. வர்ஷா கஜேந்திரகட்கர்

அறிவியலில் முதுகலைப் பட்டம் பெற்ற வர்ஷா கஜேந்திரகட்கரின் எழுத்தில் அவரது அறிவியல் பின்னணி ஆழமாகப் பிரதிபலிக்கிறது. மராத்தி மொழியின் குறிப்பிடத்தக்க படைப்பெழுத்தாளர், மொழிபெயர்ப்பாளர், உள்ளடக்க உருவாக்குநர் என 25 ஆண்டுகளுக்கும் மேலாக இலக்கியத் துறையில் இயங்கி வருகிறார்.

சுற்றுச்சூழல், இயற்கை, குழந்தை இலக்கியம் ஆகியவற்றை அடிப்படையாகக் கொண்ட ஆழமான ஆய்வுகளுடன் கூடிய படைப்புகளுக்காகப் பெரிதும் அறியப்பட்டாலும், அறிவியல் கருத்துகளைச் சுவாரசியமான கதைசொல்லலுடன் இணைக்கும் அறிவியல் புனைகதைகளையும் குழந்தைகளுக்கான நூல்களையும் எழுதியுள்ளார்.

25-க்கும் மேற்பட்ட நூல்களை எழுதியும் மொழிபெயர்த்தும் உள்ளார். அறிவியல் மற்றும் சூழலியல் கருத்துகளை இளம் வாசகர்களுக்கும் பொதுவாசகர்களுக்கும் எளிதில் அறிமுகப்படுத்துகிறார்.

அவரது குறிப்பிடத்தக்க நூல்கள்:

• सृष्टीची निर्मिती आणि इतर कथा (2012) — பிரபஞ்சத்தின் உருவாக்கம் மற்றும் பிற கதைகள். அறிவியல் ஆர்வத்தையும் புனைவையும் இணைக்கும் தொகுப்பு.
• विज्ञानतारका: स्त्री-वैज्ञानिकांचा परिचय (2014) — பெண் விஞ்ஞானிகளின் அறிமுகம். உண்மையான அறிவியல் சாதனைகளின் வழியாக வாசகர்களுக்கு ஊக்கமளிக்கும் வாழ்க்கை வரலாற்று நூல்.
• स्त्री आणि पर्यावरण (2013) — பெண்களும் சுற்றுச்சூழலும்.
• प्रेम करू या पृथ्वीवर (2023) — பூமியை நேசிப்போம்.

கடைசி இரண்டு நூல்களும் சூழலியல் சார்ந்த கருத்துகளை மையமாகக் கொண்டவை.

பிரதம் புக்ஸின் ஸ்டோரிவீவர் தளத்துடனும் அவர் விரிவாகப் பணியாற்றியுள்ளார். குழந்தைகளிடம் அறிவியல் மனப்பான்மையையும் சமூகப் பண்பாட்டு உணர்வையும் வளர்ப்பதற்காக 30-க்கும் மேற்பட்ட கதைகளை மொழிபெயர்த்தும் எழுதியும் உள்ளார்.

13. டாக்டர் மேகாஸ்ரீ தால்வி

பொறியியல் கல்வியை முடித்த டாக்டர் மேகாஸ்ரீ தால்வி, மேலாண்மைக் கல்வியைத் தொடர்ந்து முனைவர் பட்டம் பெற்றதுடன் ஆராய்ச்சியிலும் ஈடுபட்டுள்ளார். தற்போது சுயதொழில் முனைவோராக இயங்குகிறார்.

பல தசாப்தங்களாக மராத்தி இதழ்களில் அறிவியல் புனைகதைகளையும் அறிவியலைப் பொதுமக்களிடம் கொண்டுசெல்லும் கட்டுரைகளையும் எழுதி வருகிறார்.

அவரது படைப்புகளில் 150-க்கும் மேற்பட்ட மராத்தி அறிவியல் புனைகதைகள், 50-க்கும் மேற்பட்ட ஆங்கில அறிவியல் புனைகதைகள், 500-க்கும் மேற்பட்ட மராத்தி அறிவியல் கட்டுரைகள் இடம்பெறுகின்றன.

அறிவியல் மற்றும் தொழில்நுட்பத்தின் புதிய சாத்தியங்களையும் அவை சமூகத்தில் ஏற்படுத்தும் தாக்கங்களையும் ஆராய்வதில் அவர் ஆர்வம் கொண்டுள்ளார். வளர்ந்துவரும் தொழில்நுட்பங்களை அறிமுகப்படுத்துவதுடன், அவை எழுப்பும் சமூக, மனிதநேய, எதிர்காலம் சார்ந்த கேள்விகளையும் ஆராய்கிறார்.

பெரியவர்களுக்கும் இளம் வயதினருக்கும் அறிவியல் புனைகதைகளை எழுதிவருகிறார். இளம் வாசகர்களுக்கான அவரது அறிவியல் புனைகதைகளும் அறிவியல் விளக்க நூல்களும் புகழ்பெற்ற பதிப்பகங்களால் வெளியிடப்பட்டுள்ளன.

இளைய தலைமுறையினருக்கான படைப்புகளுக்கு அவர் குறிப்பிடத்தக்க பங்களிப்பைச் செய்துள்ளார். நேரடியான புனைகதைத் தொகுப்புகளுக்கு அப்பால், சிக்கலான இயற்பியல் மற்றும் தானியக்கத் தொழில்நுட்பங்களை கதைசொல்லலின் வழியாக விளக்கும் இளம் வாசகர்களுக்கான தகவல் நூல்களையும் எழுதியுள்ளார்.

மிதிலா தால்வியுடன் இணைந்து எழுதிய यंत्राच्या विश्वात (2021), இயந்திரங்களின் உலகம் என்ற பொருளைக் கொண்டது. இயந்திரவியல், கணினிகள், சிக்கலான இயந்திர நுண்ணறிவு ஆகியவற்றின் வரலாற்றை இந்நூல் எடுத்துரைக்கிறது. மேல்நிலைப் பள்ளி மாணவர்களிடமும் இளம் வயதினரிடமும் அறிவியல் மனப்பான்மையை வளர்க்கும் வகையில் இது வடிவமைக்கப்பட்டுள்ளது.

அவரது பொதுவான அறிவியல் புனைகதைத் தொகுப்புகள் இளம் வாசகர்களிடையே பரவலாகப் படிக்கப்படுகின்றன. அவற்றில் ரோபாட்டிக்ஸ், செயற்கை நுண்ணறிவு, எதிர்கால விளையாட்டுகள் போன்ற கருப்பொருள்கள் இடம்பெறுவதால் இளைஞர்களிடையே சிறப்பான வரவேற்பைப் பெற்றுள்ளன.

அவரது முக்கியமான அறிவியல் புனைகதை நூல்கள்:

• प्रारंभ (2014) — தொடக்கம் அல்லது விடியல். தொழில்நுட்பம், மனித நடத்தை, அன்றாட சமூக மாற்றங்கள் ஆகியவற்றின் சந்திப்பை ஆராயும் ஊகப் புனைகதைகளின் ஆரம்பகாலத் தொகுப்பு.
• प्रिमझाल मान आणि अन्य विज्ञानकथा (2017) — மேம்பட்ட உயிரித் தொழில்நுட்பம் மற்றும் செயற்கை நுண்ணறிவு சார்ந்த கதைகள்.
• पॉपअप आणि इतर विज्ञानकथा (2019) — நுண்தொழில்நுட்பம், டிஜிட்டல் ஊடுருவல், அண்மைக்கால எதிர்காலத் தொழில்நுட்பங்கள் ஆகியவற்றை ஆராயும் கதைகள்.
• आगमन (2023) — அண்ட மாற்றங்கள், எதிர்காலத் தொழில்நுட்பங்கள், விண்வெளி வழியிலான கோளிடைத் தொடர்புகள் அல்லது முக்கியமான அறிவியல் முன்னேற்றங்கள் போன்ற கருப்பொருள்களைக் கொண்ட சிறப்பு அறிவியல் புனைகதை நூல்.

அவரது பிரபலமான एलियन्स येतील तेव्हा (2021) நூல், “வேற்றுக்கிரகவாசிகள் வரும்போது” என்ற பொருளைக் கொண்டது. இளம் வயதினருக்காக எழுதப்பட்டுள்ள இந்நூல் விண்வெளி ஆய்வு, ரோபாட்டிக்ஸ், வேற்றுக்கிரகவாசிகளுடனான சந்திப்பு ஆகியவற்றைத் துல்லியமான அறிவியல் தகவல்களுடன் இணைத்து அறிவியல் மனப்பான்மையை வளர்க்கிறது.

டைனோசர்களின் காலத்திலிருந்து எதிர்காலத்தில் நிலவில் உருவாகும் மனிதக் குடியிருப்புகள் வரை வாசகர்களை அழைத்துச் செல்லும் சாகசக் கதைகள் இதில் இடம்பெறுகின்றன. விண்வெளி ஆய்வு, நிலவில் வாழ்வது, வேற்றுக்கிரகவாசிகளுடனான தொடர்பு ஆகியவை முக்கியமான கருப்பொருள்கள்.

கணிதத்தை அடிப்படையாகக் கொண்ட அவரது गणित गोष्टी (2023) நூலும் குறிப்பிடத்தக்கது. கணிதத்தின் மீதான அச்சத்தைப் போக்குவதற்காகக் குழந்தைகளுக்கும் மாணவர்களுக்கும் எழுதப்பட்ட சிறுகதைகளின் தொகுப்பு இது. அன்றாட வாழ்க்கையில் காணப்படும் சுவாரசியமான நிகழ்வுகள் மற்றும் எளிய செயல்பாடுகளின் வழியாகக் கணிதக் கருத்துகளை அறிமுகப்படுத்தி, அந்தப் பாடத்துடன் இளம் வாசகர்கள் நட்புறவை வளர்த்துக்கொள்ள உதவுகிறது.

அவரது கதைகள் இந்தி, கன்னடம், ஆங்கிலம், பிரெஞ்சு, ஜெர்மன், ஸ்பானிஷ் ஆகிய மொழிகளில் மொழிபெயர்க்கப்பட்டுள்ளன.

Popup Ani Itar Vidnyankatha நூலுக்காக 2026-ஆம் ஆண்டு நாசிக் பொது நூலக விருதையும், அதே நூலுக்காக 2025-ஆம் ஆண்டு புனே மராத்தி கிரந்தாலய சேதனா விருதையும் பெற்றுள்ளார்.

14. ஸ்மிதா போட்னிஸ்

மும்பையைச் சேர்ந்த ஸ்மிதா போட்னிஸ் அறிவியல் புனைகதை எழுத்தாளர், ஆய்வாளர், அறிவியல் தொடர்பாடலாளர். மராத்தி இலக்கியத்தில் முதுகலைப் பட்டம் பெற்ற இவர், மராத்தி மற்றும் இந்தி மொழிகளில் அறிவியல் புனைகதைகளை எழுதுகிறார்.

அறிவியல், தொழில்நுட்பம், மனித அனுபவம் ஆகியவை சந்திக்கும் இடத்தை அவரது கதைகள் ஆராய்கின்றன. மனித உணர்வுகள், சமூக யதார்த்தங்கள், தத்துவச் சிந்தனைகள், அறவியல் சிக்கல்கள், மனித மனத்தின் சிக்கலான இயல்புகள் ஆகியவை அவரது படைப்புகளில் பிரதிபலிக்கின்றன.

செயற்கை நுண்ணறிவு, குளோனிங், ரோபாட்டிக்ஸ், சுற்றுச்சூழல் பிரச்சினைகள், மனித நினைவாற்றல் மற்றும் உணர்வுநிலை, மூளைத் தொழில்நுட்பங்கள், டிஜிட்டல் இரட்டையர்கள், மரபணுப் பொறியியல், வேற்றுக்கிரக உயிர்கள், இணைப் பிரபஞ்சங்கள், காலப்பயணம், காலச் சுழற்சிகள் ஆகியவற்றை மையமாகக் கொண்ட அறிவியல் புனைகதைகளை எழுதியுள்ளார்.

மர்மம், உளவியல், திகில், நகைச்சுவை, உருவகப் புனைகதை ஆகிய கூறுகளைக் கொண்ட அறிவியல் புனைகதைகளும் அவரது படைப்புகளில் இடம்பெறுகின்றன.

அவரது தனிப்பட்ட அறிவியல் புனைகதைத் தொகுப்பான पिसांतोला (2026), “ஒரு இறகின் எடை” என்ற பொருளைக் கொண்டது. பல அறிவியல் புனைகதைத் தொகுப்பு நூல்களிலும் இவர் கதைகளை எழுதியுள்ளார். மராத்தி அறிவியல் புனைகதை தொடர்பான புனைகதைகள், நாவல்கள், மொழிபெயர்ப்புகள், அறிவியல் கட்டுரைகள், ஆய்வுக் கட்டுரைகள் ஆகியவற்றையும் வெளியிட்டுள்ளார்.

அறிவியல் தொடர்பாடலாளராக, Marathi Sci-Fi Stories Hub என்ற யூடியூப் சேனலை நடத்துகிறார். பொதுமக்களிடையே அறிவியல் விழிப்புணர்வை வளர்ப்பதற்காக அறிவியல் புனைகதைகள், அறிவியல் கட்டுரைகள், குறுங்காணொளிகள் ஆகியவற்றை இச்சேனலில் வழங்குகிறார். அறிவியல் கருப்பொருள்களைக் கொண்ட ஓரங்க நாடகங்களையும் எழுதியுள்ளார்.

மேம்பட்ட அறிவியல் கருத்துகளையும் மனித உணர்வுகளையும் இணைப்பதன் மூலம், அறிவியல் கருத்துகள் சிக்கலானவையாக இருந்தாலும் இளம் வாசகர்களை ஈர்க்கும் வகையில் அவற்றை வழங்குகிறார். நீண்ட நூல்களை வாசிக்கத் தொடங்கத் தயங்கும் பதின்வயதினருக்கு அவரது யூடியூப் சேனல் ஒரு நல்ல தொடக்கமாக அமையும். வகுப்பறை விரிவுரையைப் போல இல்லாமல் அறிவியல் புனைகதைகளை அனுபவிப்பதற்கான ஊடாடும் வாய்ப்பையும் அவரது நாடகங்கள் வழங்குகின்றன.

அவரது அறிவியல் புனைகதைகளும் அறிவியல் தொடர்பாடல் முயற்சிகளும் பதின்வயதினரையும் இளைஞர்களையும் நேரடியாகச் சென்றடைந்து அவர்களிடம் தாக்கத்தை ஏற்படுத்துகின்றன.

சந்த் துகாராமின் புகழ்பெற்ற ஆன்மிக அபங்கப் பாடலில் இடம்பெறும் சொற்றொடரான आपुले मरण (2014), “தனது சொந்த மரணம்” என்ற பொருளைக் கொண்டது. இந்த ஓரங்க நாடகத்துக்கு 2015-ஆம் ஆண்டு ஆவிஷ்கார் ஓரங்க நாடகப் போட்டியில் இரண்டாம் பரிசு கிடைத்தது.

மராத்தி மொழியில் அறிவியல் தொடர்பாடலுக்காக அவர் ஆற்றிய பங்களிப்பைப் பாராட்டி, 2026-ஆம் ஆண்டுக்கான பேராசிரியர் மோ. வா. சிப்ளுங்கர் அறிவியல் தொடர்பாளர் விருது வழங்கப்பட்டுள்ளது.

விருதாளர்களுக்கு வாழ்த்து