1

அத்தனை ஒளியும்
திரும்பிச்சென்ற பின்

இரவு முழுதும்
மலராத இதழ்களை
கைகளில் வைத்துக்கொண்டு
வான் பார்த்தபடியே
நிற்கிறது

ஒளியை ஒளியின்மையால் பார்க்கும்போது
வெளிச்சமாகிறது ஒளி

*
ஒளிக்கு
வெளியே இருக்கிறது
வெளிச்சம்

அதன் வேறு வேறு வடிவங்களாக
விழுந்துகிடக்கிறது நிழல்

*
ஒளியின் பொருள் பட்டு
மூழ்கியதெல்லாம் நிழல்களாக
நிழல்களின் வாயிலாக எதை நிரூபிக்க
விரும்புகிறாய்

ஒளியின் தோற்றத்தையா?

ரூபத்தின் நிழல் ரூபத்தைவிடவும்
ஒளிக்கே அர்த்தமாக விளங்குவதாய்
நிகழ்கின்றன யாவும்

அதுவும்
அஸ்தமனம்
கடந்தும்

---

2

சிறு இலை தான் விழுந்தது
அசைவின் அத்தனையுமாக நீரானது
விண்மீன்கள் ஒன்றையொன்று மோதிக்கொள்ள
நிலவு வேறு சற்று நின்றிருந்தது

அசைவுகள் ஓய்ந்த பிறகு

மோதிய எல்லாம்
அதனதன் இடத்திற்குச்
சென்றதும்

அசைவுகள்
அசைவின்மையால்
பொருள்
படுகின்றன

---

3)

நதி வளர்ந்த
கிளை வழியில்
ஒரு மேடு
தன் உயரத்திலிருந்துகொண்டே
நீரைத் தொட நினைக்கிறது
அதனருகில்
ஒரு பள்ளம்
நதியிலிருந்து விடுப்பட்டும்
கிளை நிரம்பும் பொழுதெல்லாம்
தானும் நிரம்புகிறது

---

4)

அன்பு மகளே…

ஒரு மரம்
இல்லாததின் வெட்டை
வானம் வரையிலும் தொடர்வது போல்
என் நோய்மையின் அறிகுறிகள்
உன்னிலும் வளர்கின்றன

---

5)

துயர் மிகுந்த
ஓர் இரவில் தான்
முழுநிலவையும்
மறைக்கக் கற்றுக்கொண்டது வானம்

இதில் மழை வேறு
பூக்கும் நேரத்தில் தான்
வரவேண்டுமா?

---

6)

காடுகள்
சிறு சிறு வேடங்கள்
தரித்து
நிற்கின்றன

ஒரு பூவிற்கும்
சிறு வேடம் தான்
நீரில் விழுந்த நிழல்களென
அத்தனை அசைவுகள்

மேலும்

காட்டின் பூக்களை
ஒளியின் வழியாகத் தொடுவதைவிடவும்
வேறு மெல்லிய வழிகள் ஏதேனும்
உள்ளனவா?

---

7)

நீரின் திசைகள் மீறி
மீன்கள் இங்கேயே இருப்பது
அடியாழத்தில் தான்

கரைகள் முழுதும் காத்திருக்கின்றன
நெளியும் புழுக்களென