1. தூண்டில்

பணமெனும் மீன்
தீண்டும் வரையில்
மனத்தூண்டில் பிடித்திருக்கும்
ஒவ்வொருவரையும்
புத்தராகவே அமர
வைக்கிறது ஆசைக்குளம்!

---

2. பாடம்

மனப்பாடப் பகுதியினை ஒப்பித்தவாறே
பாட்டிலில் மீதமிருக்கும்
நீரை வேருக்கு ஊற்றுகிறாள்
வீடு திரும்பும் பள்ளிச்சிறுமி
தலையசைத்து பாடம் படிக்கின்றன
உறிஞ்சும் கிளைகள்.

---

3. தாவும் அணில்

ஆலமரத்திற்கு வாய்வரைந்து
உரையாடச் செய்கிறது
மரப்பட்டையினைக் கட்டியணைத்து
இங்கும் அங்கும்
தாவும் அணில்.

---

4. விலகியோடல்

நனைவதில் அத்தனை அலாதி
வரவேண்டுமென
மனதுக்குள் விரும்புகிறார்கள்
மேலே படாதவரை
இதமாயிருக்கிறது அவர்களுக்கு
விரும்பியிறங்கி கரைபுரண்டு
பொழிகையில் விரோதியினைப் போல
விலகியோடும் அவர்களைப்
புரிந்துகொள்ள இயலவில்லை
அடைமழைக்கு.

---

5. இறகுப்பந்து

தேடி வரும் இறகுப்பந்தின்
தலையில் ஓங்கியடித்து
எதிரிலிருப்பவருக்கு கிடைக்கவிடாமல்
கீழ்விழச் செய்வதில்தான்
வெற்றியிருக்கிறதென
கற்றுத்தருகிறது மையத்தில்
வலை விரித்திருக்கும்
அற்ப உலகம்.