எம்பிக் குதித்தல்

எம்பிக் குதித்தால் வானைத் தொட முடியாது
எல்லாரும் அறிந்த ஒன்று
ஆனால் அவர் அதற்காக குதிக்கவில்லை
எல்லாரும் அறிந்த ஒன்றை எல்லாருக்கும் சொல்கிறார்
குறிப்பெடுத்துக் கொள்கிறார்கள்
குறிப்பெடுப்பது என்பது வானத்தை நோக்கி
ஒரு முறை தவ்வுவது
வானத்தை நோக்கிப் போவது
ஒரு சம்பிரதாயம் போல
திரும்ப எல்லாரும்
பூமி வருவதும் ஒரு சம்பிரதாயம்

---

உலக விசாரணை

எனக்கென தனியாக எதுவும் இல்லை
உதாரணத்திற்கு
பழுத்த இலைகளுக்கிடையே ஒன்றாக
நானும் இருக்கிறேன்
உலக விசாரணையில் இருக்கையில்
மொத்தமாக நடந்து கொள்வது தான் நியாயம்
அப்படியாயின்
மொத்த துக்கத்தில் என் சொந்த துக்கமெங்கே

---

குளங்கள்

நீரைக் கையால்
அள்ளும் போது
நீர் என்ன செய்கிறது
ஏற ஒத்துழைத்தது
ஏறியதை இழுத்தது
ஏறியதே இறங்கியது
எல்லாவற்றையும் செய்தது
எல்லாவற்றிலும் இருந்தது
இப்பொழுது கை ஒரு குளம்
பொதுவாக நீரினுள்
ஒரு சொட்டு ஒரு குளம்