“செயற்கை நரம்பியல் நெட்வொர்க்குகள் மூலம் செயற்கை நுண்ணறிவு (AI) இன் இன்றைய ஏற்றத்திற்கு அடித்தளமாக இருக்கும் இயந்திர கற்றல் நுட்பங்களை உருவாக்கியதன் அடிப்படை கண்டுபிடிப்புக்களுக் காக ஜான் ஜே. ஹாப்ஃபீல்ட்  (Princeton University, USA) மற்றும் ஜெஃப்ரி இ.ஹிண்டன் (University of Toronto, Canada) ஆகிய இரண்டு விஞ்ஞானிகளுக்கும், 2024 இயற்பியலுக்கான நோபல் பரிசு வழங்கப்படுகிறது” என்று ஸ்வீடன் நோபல் குழு தனது செய்திக்குறிப்பில் தெரிவித்துள்ளது.

“காலநிலை மாதிரியை மேம்படுத்துதல், சூரிய மின்கலங்களின் வளர்ச்சி மற்றும் மருத்துவப் படங்களின் பகுப்பாய்வு”

ஆகியவை இவ்விஞ்ஞானிகளின் கண்டுப்பிடிப்பால் மேலும் பயன்பாட்டில் உள்ளவை‌ என்றும் குறிப்பிட்டுள்ளது.

ஜான் ஹாப்ஃபீல்ட் மற்றும் ஜெஃப்ரி ஹிண்டன் ஆகியோர் செயற்கை நரம்பியல் வலையமைப்புகளை ஆராய்வதற்காக இயற்பியல் மற்றும் அறிவாற்றல் அறிவியலின் பின்னணிகளால் உந்தப்பட்டனர். ஹாப்ஃபீல்ட், மூளையின் கட்டமைப்பால் ஈர்க்கப்பட்டு, தரவுகளில் வடிவங்களைச் சேமித்து, புனரமைக்க அணு சுழற்சியின் கொள்கைகளைப் பயன்படுத்தி ஒரு துணை நினைவக வலையமைப்பை உருவாக்கினார்.

‘போல்ட்ஸ்மேன் இயந்திரம்‘ மூலம் ஹிண்டன் இதை விரிவுபடுத்தினார். மேலும் வலையமைப்புகள் தன்னாட்சி முறையில் தரவு வடிவங்களைக் கற்றுக் கொள்ளவும் அடையாளம் காணவும் புள்ளியியல் இயற்பியலைப் பயன்படுத்தினார்.

இவர்கள் பணியின் அடிப்படையில் உருவான நினைவகம் மற்றும் நெட்வொர்க் கட்டமைப்புகள் மூலம் கற்றல் போன்ற அறிவாற்றல் செயல்பாடுகள்  இயந்திர கற்றலுக்கான அடித்தளத்தை அமைத்தது.

செயற்கை நுண்ணறிவில், நரம்பியல் வலையமைப்புகள் என்பது மனித மூளையைப் போலவே தகவல்களைக் கற்றுக்கொள்வது மற்றும் செயலாக்குவது போன்ற அமைப்புகளாகும். ஒரு நபரைப் போலவே, அனுபவத்திலிருந்து கற்றுக்கொள்ள அவை AI களை செயல்படுத்துகின்றன. இது ஆழ்ந்த கற்றல் என்று அழைக்கப்படுகிறது.

இயந்திர கற்றல் செயற்கை நுண்ணறிவுக்கு மிகவும் முக்கியமானது, ஒரு கணினி எவ்வாறு தகவலை உருவாக்க தன்னைப் பயிற்றுவிக்க முடியும் என்பதை இது உருவாக்குகிறது.

இணையத்தில் நாம் தேடும் விதம் ( கூகுள் தேடல்) முதல் நமது ஸ்மார்ட் கைபேசிகளில் புகைப்படங்களைத் திருத்துவது வரை இன்று நாம் சாதாரணமாகப் பயன்படுத்தும் பரந்த அளவிலான தொழில்நுட்பத்தை இது இயக்குகிறது.

இயந்திரக் கற்றல் மற்றும் செயற்கை நுண்ணறிவுக்குப் பின்னால் உள்ள அறிவியலைச் சுட்டிக்காட்டிய நோபல் கமிட்டி, அதன் மறுபக்கத்தையும் குறிப்பிட்டுள்ளனர். இயந்திரக் கற்றல் மகத்தான நன்மைகளைக் கொண்டிருந்தாலும், அதன் விரைவான வளர்ச்சி நமது எதிர்காலத்தைப் பற்றிய கவலையையும் எழுப்புகிறது. ஒட்டுமொத்தமாக, பாதுகாப்பான மற்றும் நெறிமுறை வழியில் இத் தொழில்நுட்பத்தை செலுத்திப் பயன்படுத்துவதற்கான பொறுப்பு மனித குலத்திற்கானது என்பதையும் சுட்டிக் காட்டியுள்ளனர்.

பேராசிரியர் ஹிண்டன் செயற்கை நரம்பியல் வலையமைப்புகளில் தனது பணி,

“தொழில்துறை புரட்சி போல் புரட்சிகரமானது ஆனால் நமது உடல் திறன்களுக்கு பதிலாக, அது நமது அறிவுசார் திறன்களை மீறும்,”

என்று கூறியுள்ளார்.

மேலும்: The Nobel Prize in Physics 2024 – Scientific background – NobelPrize.org