சமீபத்தில் இந்தியாவிற்குச் சென்றிருந்த மகள் “The Gita for Children” புத்தகத்தை வாசித்து விட்டு மிகவும் நன்றாக இருக்கிறது என்று எனக்கும் ஒன்றை வாங்கி பரிசளித்தாள். செவிவழியாகச் சிறு வயதிலிருந்து கேட்டறிந்திருந்தாலும் குழந்தைகளுக்காக ஆங்கிலத்தில் எழுதப்பட்டிருந்த புத்தகத்தைப் படிக்க ஆவலாக இருந்தேன். இந்தியாவில் வளரும் குழந்தைகளுக்கு ஓரளவு ராமாயணம், மகாபாரத புராதன கதைகள் பெரியவர்கள் மூலமாக கேட்கும் அனுபவம் இருக்கும். தொலைக்காட்சித் தொடராகப் பார்க்கும் அனுபவமும் கிடைத்திருக்கும். அப்படி இல்லாத குழந்தைகளுக்குப் பெரியவர்களின் துணையுடன் வாசித்து மகிழும் வகையில் எழுதப்பட்டிருப்பது தான் இப்புத்தகத்தின் சிறப்பு.
‘பகவத் கீதை’ மனித வரலாற்றில் மிகவும் ஆழமான ஆன்மீக நூல்களில் ஒன்றாகும். இது கடமை, தைரியம், நோக்கம், உள் நல்லிணக்கம் பற்றிய ஒரு தத்துவ உரையாடல். பள்ளிகளில் நல்லொழுக்க வகுப்புகள் வாயிலாகவும், வீட்டில் பெரியவர்கள் வாயிலாக அறிவுரையாக நமக்கு அறிமுகப்படுத்தப்பட்ட கருத்துக்களை அதன் அசல் வேதம் மூலமாக கற்பிப்பது சற்று கடினமாக இருக்கும். அவர்களுக்கு பண்டைய ஞானத்தையும் நவீன குழந்தைப் பருவ புரிதலையும் இணைக்கும் ஒரு அரிய பொக்கிஷமாக ‘ரூபா பை’ எழுதிய ‘தி கீதை ஃபார் சில்ட்ரன்’ புத்தகம் கண்டிப்பாக உதவும்.
குழந்தைகள் எழுத்தாளர் பாய், கீதையின் சாராம்சத்தைப் பாதுகாத்து ஒரு கதையாக எளிமையாக விளக்கியுள்ளார். வாழ்க்கையின் போர்க்களத்தில் சரியான நடவடிக்கை குறித்து உறுதியாகத் தெரியாத குழப்பத்தில் நிற்கும் அர்ஜுனனுக்கு கிருஷ்ணரின் வழிகாட்டுதலை சமஸ்கிருத வசனங்கள், வர்ணனைகளுக்குப் பதிலாக, சிறிய அத்தியாயங்கள், எளிய மொழி, தொடர்புடைய எடுத்துக்காட்டுகள் மூலமாக விவரித்திருப்பது சிறப்பு.
ஒவ்வொரு அத்தியாயமும் தெளிவான எடுத்துக்காட்டுகளுடன் முடிகிறது. ஒரு இளம் வாசகருக்கு உரையாடலின் பொருள், அது அன்றாட வாழ்க்கையில் எவ்வாறு வெளிப்படுகிறது என்பதை சிந்தனைமிக்க பிரதிபலிப்புகள், விளக்கக் கதைகள் மூலம் குழந்தைகள் புரிந்து கொள்ளும் வகையில் தெளிவுற விளக்கியுள்ளார்.
தற்போதைய காலகட்டத்தில் போதிய வழிகாட்டுதல் இல்லாமல் தடுமாறி நிற்கும் குழந்தைகளுக்கு அதிகரித்து வரும் உள் அழுத்தம், கவனச்சிதறல், சுய சந்தேகத்தை எதிர்கொள்ள இது ஒரு திசைகாட்டியாக இருக்கிறது.
சரி… கீதை உண்மையில் எதைப் பற்றியது?
பலரும் இதை ஒரு பழைய மத புத்தகம் என்றே நினைக்கிறார்கள். ஏதோ ஒரு தீவிரமான, சிக்கலான பெரியவர்கள் கூட புரிந்துகொள்ளச் சிரமப்படும் விஷயம் என்று நினைக்கிறார்கள். ஆனால் கீதை மிகவும் எளிமையான ஒன்றிலிருந்து தொடங்குகிறது: அர்ஜுனன், மிகத்திறமையான எதிரிகள் அஞ்சி ஓடும் ஒரு போர்வீரன். ஒரு போர்க்களத்தில் மிகுந்த குழப்பங்களுடன் நிற்கிறான். அவனுக்கு என்ன செய்வது என்றே தெரியவில்லை. பயம், குழப்பம், சுய சந்தேகம், தர்மம் என்று பலவித மனச்சிக்கல்களுக்கு ஆளானவனாக தனது உறவுகளே பகையாக நிற்கும் களத்தில் கலங்கி நிற்கும் மாவீரன்.
பல நேரங்களில் நம்முடைய வாழ்க்கையிலும் நாம் அப்படித்தான் உணர்கிறோம். களமும் எதிரிகளும் வெவ்வேறாக இருந்தாலும் உணர்ச்சிகள் ஒன்றாகவே இருக்கின்றன. ஒரு குழந்தை தேர்வுக்கு முன் பதட்டமாக இருக்கும்போது, நண்பர்களால் ஒதுக்கி வைக்கப்படுவதாக உணரும்போது, உணர்வுகள் புரிந்துகொள்ளப்படாத போது, எளிதானதைச் செய்வதற்கும் சரியானதைச் செய்வதற்கும் இடையில் யாராவது தேர்வு செய்ய வேண்டியிருக்கும் போது, கடினமாக உழைத்தும் இன்னும் பலன்களைப் பார்க்காதபோது, “நான் இதற்குத் தகுதியானவன் தானா” என்று நம்மை நாமே கேட்டுக் கொள்ளும் தருணங்களைப் பற்றியது தான் கீதை.
இது உண்மையில் போரைப் பற்றியது அல்ல.
இது நித்தம் நித்தம் நமக்குள் நடக்கும் பயம், சந்தேகம், ஒப்பீடு, ஏமாற்றம், குழப்பம் போன்ற போர்களைப் பற்றியது.
குழப்பமான அந்த தருணத்தில், கிருஷ்ணர் அர்ஜுனன் சொல்வதை முழுமையாக கேட்கிறார். முடிவுகளுக்குப் பதிலாக முயற்சியில் கவனம் செலுத்துவது எப்படி, வாழ்க்கை நியாயமற்றதாக உணரும்போது எப்படி நிலையாக இருப்பது என்று தெளிவாகச் சிந்திக்க உதவுகிறார். பயமின்றி எப்படிச் செயல்படுவது என்று கற்றுக்கொடுக்கிறார்.
அதனால்தான் கீதை இன்றும் முக்கியமானது.
பள்ளி அழுத்தம், சமூக ஊடகங்கள், போட்டி, எதிர்பார்ப்புகள் போன்ற வேகமான உலகில் நம் குழந்தைகள் தற்பொழுது வளர்ந்து வருகின்றனர். மதிப்பெண்கள் பெறுவது எப்படி, தொழில்நுட்பத்தை எவ்வாறு பயன்படுத்துவது என்று அவர்களுக்குக் கற்றுக்கொடுக்கிறோம். ஆனால் தோல்வியை எப்படி எதிர்கொள்வது, பொறாமையை எவ்வாறு கையாள்வது, விஷயங்கள் தங்கள் வழியில் நடக்காதபோது அமைதியாக இருப்பது எப்படி என்று கற்றுக்கொடுக்கிறோமோ?
கீதை அமைதியாக இந்தக் கேள்விகளுக்குப் பதிலளிக்கிறது.
“எந்த ஒரு செயலையும் முழுமனதுடன் செய்யுங்கள். முடிவைப் பற்றி கவலை கொள்ளாதீர்கள். பயப்படலாம். ஆனால் அதுவே உங்களைக் கட்டுப்படுத்த விடாதீர்கள். பிரபலமாக இருப்பதை விட சரியானதைச் செய்வது மிக முக்கியம். உங்கள் மனதை வலுவாக இருக்கப் பயிற்றுவிக்க முடியும்” போன்ற வாழ்க்கை அறிவுரைகளை உரைப்பது தான் கீதை.
ஒவ்வொரு குழந்தையும் வாழ்க்கையில் எதிர்கொள்ளும் போர்களை அவர்கள் புரிந்துகொள்ளும் விதத்தில் எதிர்கொள்ள கீதையை எடுத்துரைப்பது அவசியமாகிறது.
ஒரு குழந்தைக்கு, இந்தப் பாடம் வாழ்க்கையை மாற்றும்.
“நான் வெற்றி பெறவில்லை. வாழ்க்கையில் தோற்றவன்” என்று நினைப்பதற்குப் பதிலாக, “நான் என்னால் முடிந்ததைச் செய்தேன். அதுதான் முக்கியம்.” என்று புரிந்துகொள்ளத் தொடங்குகிறார்கள். இது மீள் தன்மையை உருவாக்கி பயத்தைக் குறைக்கிறது. தவறான முடிவுகள் எடுப்பதைக் குறைக்கிறது.
அர்ஜுனன் ஒரு ஹீரோ. பயமாகவும் குழப்பமாகவும் இருக்கிறான். அதுவே ஆறுதலளிக்கிறது. நிச்சயமற்ற உணர்வு என்பது பலவீனத்தைக் குறிக்காது. கேள்விகள் கேட்பது தவறல்ல. குழப்பம் என்பது வளர்ச்சியின் ஒரு பகுதி. குழந்தைகள் எப்போதும் “நம்பிக்கையுடன்” இருக்க வேண்டும் என்று எதிர்பார்க்கும் உலகில், அர்ஜுனன் மூலமாக சந்தேகத்தையும் பயத்தையும் இயல்பாக்குகிறது. தர்மம், அதர்மம் என்ன என்று விளக்குவதன் மூலம் துன்புறுத்தப்படும் ஒருவருக்கு ஆதரவாக நிற்பது, சங்கடமாக இருந்தாலும் நேர்மையாக இருப்பதைப் புரிந்துகொண்டு அவர்களை வழிநடத்தக் கற்றுக்கொடுக்கிறது.
இன்றைய சமூக ஊடகங்கள், பள்ளி கலாச்சாரம் வாயிலாக சமூக அங்கீகாரம், ஒப்பீடுகள் இளம்வயதிலேயே குழந்தைகளுக்கு அறிமுகமாகிவிடுகிறது.
ஒவ்வொருவருக்கும் அவரவர் பாதை இருக்கிறது. அவர்களின் பயணம் தனித்துவமானது. அவர்களின் மதிப்பு தரவரிசையை அடிப்படையாகக் கொண்டது அல்ல. வெற்றி அனைவருக்கும் வித்தியாசமாகத் தெரிகிறது. பொறுப்பு பலமாகிறது. அது தண்டனை அல்ல போன்ற கீதையின் போதனைகள் வாயிலாக குழந்தைகள் சுயமரியாதையைப் பாதுகாத்து ஒப்பீட்டைக் குறைக்க உதவுகிறது.
இவை அனைத்தையும் கீதையின் சாராம்சம் இம்மியளவு குறையாமல் நவீன வாழ்க்கையுடன் குழந்தைகள் புரிந்துகொள்ளும் கொள்ளும் வகையில் பெற்றோர்-குழந்தை புத்தகமாக சமநிலையை வழங்குகிறது. இது வெறும் தத்துவம் பற்றிய புத்தகம் மட்டுமல்ல. உறுதியான இதயங்களை வளர்ப்பது, அமைதியான மனதை உருவாக்குவது, வாழ்க்கை எப்போதும் எளிதாக இருக்காது என்பதைப் புரிந்துகொள்ள உதவும் புத்தகம்.
இப்போதிலிருந்து பல வருடங்கள் கழித்து, ஒவ்வொரு அத்தியாயத்தையும் அவர்கள் நினைவில் வைத்திருக்காமல் போகலாம். ஒருவேளை, வாழ்க்கை நிச்சயமற்றதாக உணரும்போது, ஒரு சிறிய உள் குரல் கிசுகிசுக்கும்:
“உங்கள் கடமையைச் செய்யுங்கள். உங்களால் முடிந்ததைச் செய்யுங்கள். நிலையாக இருங்கள்.” அந்தக் குரல் அவர்களுக்குள் வாழ்ந்தால், வெற்றியை விட மிகப் பெரிய பலத்தை நாம் அவர்களுக்குக் கொடுத்திருக்கிறோம்.
அதுவே வாழ்நாள் முழுவதும் நீடிக்கும் ஒரு பரிசு.