பீடி கையோடு
சுற்றித் திரியும்
தாத்தா
பேரன் உடனிருந்தும்
பீடியையே
பற்ற வைப்பார்
தொற்றிக்கொள்ளும் புகை
நோயை உருவாக்கும் என தாத்தாவிடம்
பலர் போதித்தும் பலனேயில்லை
மாரியாத்தா கோயிலிலே
பால் குடம் எடுக்கையில
சாமியாடி வந்து
சேதி சொன்னா மாரியாத்தா
பேரன்யிருக்கையில
பீடி நெடி வந்துச்சுன்னா
நோய்க்கொண்டு
போகும்முன்னே
பேரன நான் கொண்டுபோவேன்னு
சக்தியுள்ள தெய்வம்
நம்ம குலத்தைக் காக்கும்
மாரியத்தா
கும்புடுக்கோன்னு
முப்பாட்டன் பேச்சைக்
கேட்டு வாழ்ற
முனுசாமி பாட்டன்
பீடிய விட்டொழிஞ்சு
வெகு நாட்களாயிடுச்சு
நினைச்சத சாதிச்சிட்டோம்ன்னும்
ராவெல்லாம் இருமல்
சத்தம் இல்லேன்னும்
நிம்மதியா தூங்குறா
பொய்சொல்லி சாமியாடிய
கங்கம்மாப் பாட்டி