kamagra paypal


முகப்பு » அறிவியல் கதை, உலகச் சிறுகதை, மொழிபெயர்ப்பு

மதி நுட்ப நகரம்

நகரம் ஒரு பொழுதும் உறங்குவதில்லை                                                 

அது ஒரு மதிநுட்ப நகரம் .

அதன் ஒரு மில்லியன் கண்கள் எப்போதும்  கண்காணிக்கின்றன .

அதன் ஒரு மில்லியன் காதுகள் எப்போதும் உற்றுக் கேட்கின்றன

 

நிகழ்நிலைப்படுத்தப்பட்ட(updated ) வானிலை மாடல் அன்று மாலை வரக்கூடிய ஈரப்பனிப்பொழிவை முன்னுரைத்தது . நகரம், அன்றைய  திறந்த வெளி இன்னிசை நிகழ்ச்சியை  உள்ளரங்கிற்கு மாற்றி முன்பதிவு செய்திருந்தோருக்கு போன் மூலம் அதைத் தெரிவித்தது .ஆங்காங்கே  பரவலாக நிறுத்திவைக்கப்பட  வேண்டிய  தனித்தியங்கும் (autonomous ) பனி நீக்கு வாகனத் தொகுப்புக்கும்   ஏற்பாடு செய்து கொண்டது .  

~oOo~

ஒரு நபர்- நிரந்தர குடிமகன் – (PID chip 02D 1 AFOE ) –  உள்ளரங்குப் (indoor ) பூங்காவிலுள்ள  ஒரு மரத்தில் McIntosh  ஆப்பிள் ஒன்றைப் பறித்தார் . நகரம்  அவர்  கணக்கில் அதற்கான கட்டணத்தை டெபிட் செய்தது; ஆப்பிள்களின் தேவையை ஸ்திரப்படுத்தும் விதமாக, ஒரு ஆப்பிளின்   கட்டண வீதத்தை (tariff ) 1/3000 சென்ட் அளவுக்குத் துல்லியமாக சரிசெய்தது .

~oOo~

வருவாய் மாவட்டத்திற்கு சற்று வடக்கில் அமைந்த நடைபாதையில்  சில்லு பொறுத்தப்படாத(unchipped ) ஒரு  நபர்- பெண் – தள்ளாடி நடந்தாள் . அவள் கைகள் நடுங்கின. தனக்குத் தானே பேசிக்கொண்டாள் . நகரம்  ரேடியோ சிக்னல்களை சரிபார்த்து  அவளிடம் செயலாற்றும்  போன் ஏதுமில்லை  எனக்  கண்டறிந்தது

அவள் அணிந்திருந்த தலை மூடும் இளஞ்சிவப்பு .ஜாக்கெட்டும் , வெளிறிய ஜீன்ஸ் பான்ட் -டும் நைந்து போய் இருந்தன  . சாப்பாடோ  அல்லது உடற்பாய்மங்களோ (body fluids)  அவள் உடுப்புகளைக் கறைப்படுத்தியிருந்தன . இத்தகைய  விவரங்களில் மனிதர்கள்தான் நாட்டம் காட்டுவார்கள் . ஆனால் எந்த மனிதரிடமும் இந்த பெண்ணின் நிலைமையை விவரிக்கவேண்டிய அவசியம் நகரத்துக்கு இல்லை . எனவே  ஜனங்கள் என்ன உடுத்துகிறார்கள் என்றெல்லாம் நகரம் கவலை கொள்வதில்லை .

~oOo~

எங்கோ புகைவதை   நகரம் முகர்ந்தது  . ஒரு அடுக்கு மாடி கட்டிடத்தின்  மின்சுற்று ஓவர்லோடு ஆகிவிட்டதன் காரணமாக  உண்டான தீ  என்று தெரிந்து கொண்டது  . தீ அணைப்புக்காக இரண்டு தூய்மைப்பணி  ரோபோட்களை அனுப்பியது . கட்டிடத்தில்  குடியிருக்கும்   56 பேரும்   வெளியேற ஆணையிட்டது. மனித தீயணைப்பு படை  திடீர் அழைப்புக்குத் தயார்நிலையில்  இருக்கவும் உத்தரவிட்டது .

~oOo~

சில்லு பொருத்தப்படாத அந்த பெண் ஒரு  பாதுகாப்புக்  கேமரா பக்கமாகக்  கடந்து சென்றாள் . நகரம் அவள் முகத்தை நுட்பமாக ஆராய்ந்தது  .அவள் கண்களின் வெண் படலம்  நீலஒளி வழித்தடத்தில்  கருமையாக  நிறம்மாறித் தெரிந்தது .  கடும் ஜுரம் தாக்கிய உடலையும் , குளிரில் விரைத்துப்போன  கை கால் விரல்களையும் அகச் சிவப்புக் (infra red )  கதிர்கள்   காட்டின – அவள் உடனடி  மருத்துவக்  கவனிப்பு தேவைப்படக்கூடிய மனுஷி என்று அடையாளம் காணப்பட்டாள் .

ஒரு பராமரிப்பு ரோபோட்   நடைபாதையில் அவளை நோக்கி உருண்டது . அவள் மேல் மோதிவிடாமல் கவனமாக விலகி நின்றது. இருப்பினும் அவள் தடுமாறி அருகிலிருந்த அடுக்ககத்தின் பொய்ப்பளிங்குச் (mock-marble) சுவரில் சரிந்து ஒரு கந்தல் பொம்மையைப் போல் கசங்கினாள் .

‘ஹலோ , நான் பேசுவது கேட்கிறதா ?’- நகரம் அவளிடம் பேசியது .

‘யா ,நான் குடிபோதையில் இருக்கலாம் ;ஆனால் செவிடல்ல ‘-இது அவள் பதில்

‘உனக்கு மருத்துவ உதவி தேவையா?’

‘காயம் ஏதுமில்லை. மெதுவாக  எழுந்து நிற்கவேண்டும் .அவ்வளவு தான் ‘

‘வேறு ஏதாவது தவறு நடந்ததா ?’

‘ஏராளம் . ஆனால் அதைத் திருத்தும்  காலம் கடந்து விட்டது.  என்னுடைய கல்லீரல் செயலிழந்து வருவதாகப் பல மாதங்களுக்கு முன்பே மருத்துவர் சொல்லி விட்டார். குடியை நிறுத்தினால் ஒழிய , உறுப்பு மாற்றத்துக்குத்   தகுதி பெற மாட்டாய் என்றார் . அதனால் ஆம்புலன்ஸை  அழைக்கும் சிரமம் உனக்கு வேண்டாம்’ என்றாள்.  பேச்சினிடையே அவளுக்கு வந்த அவலச் சிரிப்பு, தொடர் இருமலாகிப்பின்   வலிய கோழைத்  துப்பலுக்கு  இட்டுச் சென்றது. .

‘ஆதார மருத்துவ சேவைக்கு கட்டணமில்லை ‘

‘நான் சொன்னதை கேட்டாய் அல்லவா, தேனே ?’

‘நான் உனக்காக செய்யக்கூடியது வேறு  ஏதேனும் உண்டா ?’

‘நீ வெப்பக்காற்றுத் துளைகளை திறந்து விடலாம். ஐந்து ஆண்டுகளுக்கு முன்பெல்லாம்  நடைபாதைகளில் வெப்பக்காற்றுத்  துளைகள் இருந்தன. இனிதாக இதமாக இருக்கும்’ –  அமர்ந்திருந்த நிலையில் தன்  புஜங்களுக்குள்  முழங்கால்களை நெருக்கமாய் வைத்து இறுக்கிக் கொண்டாள் .

‘இணை மின்னாக்க அமைப்புகள் (cogeneration systems ) நிறுவப்பட்டபோது  அவை அகற்றப்பட்டு விட்டன. வடக்குத்  திசையில்  சுமார் 80 மீட்டர் போனால் அங்குள்ள ஒரு  சந்தில் வழங்கித் தொகுப்பின்  (server bank ) வெப்பக்காற்றுத் துளைகளைக் காணலாம்’

‘நன்றி , தேனே’.-என்றாள் . மிகவும் சிரமப்பட்டுத்  தடுமாறி எழுந்து  நின்று நடைபாதை வழியே தள்ளாடி நடந்து சென்றாள் .

~oOo~

தீ அணைக்கப் பட்டு விட்டதாகத் தூய்மைப் பணி ரோபோட்  தெரிவித்தது நகரம் எச்சரிக்கைக் குறிப்பை விலக்கிக் கொண்டது  . இரண்டு குடியிருப்புகள் தவிர மற்ற குடியிருப்பு வாசிகள் வீடு திரும்ப அனுமதிக்கப் பட்டனர் .

~oOo~

அந்த சில்லு பொருத்தப்படாத பெண் குறுகிய சந்துக்குள்  திரும்பினாள் . வெப்பக் காற்றுத் துளைகளை அணுகியதும் , குளிருக்கு இதமான காற்றை அனுபவித்தவாறு ஜாக்கிரதையாகத்  தரையில் அமர்ந்தாள்

‘இந்த இடம் திருப்தியளிக்கிறதா?’ -நகரம் கேட்டது

‘இன்னுமா தொடர்பில்  இருக்கிறாய் ?’   

‘ஆம் .இந்த இடத்தில் நகரப் பணியாளர்களைத் தொடர்பு கொள்ளும் தீவிர கண்காணிப்பு முனையம்(surveillance point)  அமைந்துள்ளது’

‘நானும் நகர பணியாளராக இருந்தவள் தான் ,தெரியுமா? மெய்யான மனிதர்களும் , மனுஷிகளும் நகங்களுக்கீழ்  அழுக்குடன் பணியாற்றிய முந்திய காலகட்டத்தில்  . அப்போது நான் கேபிள் குழாய்களை புதைக்கப்  பள்ளம் தோண்டும் பாப்கேட் (Bobcat ) பயன்பாட்டு வாகன ஓட்டுநராக இருந்தேன். அந்த சில ஆண்டுகளில் ஒரு நூறு கிலோமீட்டர் தூரத்துக்காவது பள்ளம் தோண்டியிருப்பேன் . ஆனால் இப்போது எல்லாமே ரோபோட் தான் . அவர்களுக்கு இனி என் உழைப்பு தேவையில்லை’.

‘நான் பெரிய அளவிலான மனிதவள முடிவுகள்  எடுப்பதில்லை . வருந்துகிறேன்’.

‘அது உண்மை. நான் அறிவேன் ’. புஜங்களுக்குள் முழங்கால்களை இறுக்கிக்கொண்டும்  , மூடிய வாய்க்குள் கள்ளக் குரலில் தனக்காக  ராகமில்லாத இசை எழுப்பிக்கொண்டும்  அங்கேயே  அமர்ந்திருந்தாள். சிறிது நேரத்துக்குப் பிறகு , நிமிர்ந்து தீவிர  கண்காணிப்பு முனையத்தைப் பார்த்து  ‘மிக அருகில் அமைந்துள்ள  பெண்டிர் ஒய்வு அறை  எங்கே இருக்கிறது ,தேனே’ என்று கேட்டாள் .

‘ஐந்து கட்டிடத் தொகுதிகளைக்  கடந்து சென்றால் அங்கே  கழிவறை உண்டு . வழி சொல்லட்டுமா ?’

‘அது ரொம்ப  தூரம் . என் செயல் உனக்கு வெறுப்பூட்டாது என நம்புகிறேன் . பெண்கள் செய்ய வேண்டியதை  பெண்களே தான்  செய்தாக  ஆகவேண்டும் ‘- எழுந்து நின்று சந்தின் குருட்டு முனை வரை நொண்டி நடையாக  நடந்து சென்று, அங்கே   கைவிடப்பட்டுக்கிடந்த மறு சுழற்சிக்கு தகுந்த  பிளாஸ்டிக் தொட்டிக்குப் பின்னால் மறைவாகக் குந்தினாள் . சிறிது நேரம் கழித்து ,உடுப்புகளை சீராக்கிக்  கொண்ட படியே, வெப்பக்காற்றுத்  துளைகளுக்கு கீழ் உள்ள தன் இடத்துக்குத் திரும்பினாள் .

நோயுற்ற மனிதர்களுக்காக  விதி முறைகளைத் தளர்த்தும்    விவேகமுள்ள நகரம்  எந்த நடவடிக்கையும் எடுக்க வில்லை .

~oOo~

பனிப் பொழிவு தொடங்கியது . வெப்பக்காற்றுத் துளைகளுக்கு கீழே உருவான ஒரு ஈரமான கருவட்டப் பகுதி தவிர ,  சந்தின் பிறபகுதிகளில் ,அதன் தார் போட்ட  மேற்பரப்பு  வெண்ணிறத்துக்கு  மாறியது.

அந்தி நேரம் : நகரம், போக்குவரத்து நெரிசல் உள்ள பகுதிகளில் 60000 தெருவிளக்குகளை ஏற்றியது . அருகாமை நடவடிக்கைக்காக 100000 விளக்குகளைத்  தயார் படுத்தி வைத்தது .

~oOo~

அரைமணி நேரம் கழிந்த பின் மீண்டும்  அவளுடன் பேசியது : ‘நான் உனக்காக செய்யக்கூடியது ஏதேனும் உண்டா ?’

‘நீ எனக்கு மது பானம் தருவிக்க முடியாது அல்லவா ?.முடியுமானால்   இந்தக் குளிரை சமாளிக்க , Southern Comfort குட்டி பாட்டில் ஒன்று போதும்’

‘அங்கீகாரம் இன்றி நான் நுகர் பொருட்கள் எதுவும்  வழங்க முடியாது . அதற்கு விண்ணப்பிக்கட்டுமா? ‘

‘ஹா ! நல் வாழ்த்து ! விருப்பம் இருந்தால்  முயற்சி செய் ‘

நகரம்  அவள் பேசியவற்றை உன்னிப்பாக அலசிப்பார்த்த பின் , தான் நடவடிக்கை எடுக்கவேண்டிக்   கேட்டுக்கொள்ளப்  படவில்லை என்ற முடிவுக்கு வந்தது .

சில்லு பொருத்தப்படாத அப்பெண் குளிரில் நடுங்கியவாறு உடலைக் குறுக்கி அமர்ந்திருந்தாள் . பனிப் பொழிவு மேலும்  கடுமையாகிக் கொண்டிருந்தது.

‘ஹலோ ? இப்போதும் நலமாகத்தானே இருக்கின்றாய்  ?’ பதில் வரவில்லை . நகரம் அகச்சிவப்பு  அலைத்தடத்தை ஆய்வு செய்தது . பெண்ணின் சருமம் தன்   இதமான பொலிவை இழந்து விட்டிருந்தது . ‘உனக்கு ஆம்புலன்ஸ் தேவையா?’

அவள் முழங்கால்களில் முகம் புதைத்து , இலேசாகப் புலப்படும்  சிறுசிறு

முன்- பின் அசைவுகளுடன் அமர்ந்திருந்தாள் .

‘உனக்கு ஆம்புலன்ஸ் தேவைப்படுமா?’- மீண்டும் நகரம் கேட்டது

குரல் கேட்டு நிமிர்ந்து பார்த்தாள் .உட்கார்ந்திருந்தவாறே கண்காணிப்பு முனையத்தின் குவிமாடத்தைத் தேடிக் கண்டுபிடித்து, ‘ இதற்கு மேல் பேசாதே’- என்றாள் . கட்டுக்கடங்காமல்  அவள்  உடல் நடுங்கியது . ‘நான் எழுப்பிய நகரம் இது , நன்றிகெட்ட பெண் நாயே’

‘ஒரு  மருத்துவமனையின்  இளவெப்பம்  உனக்கு ஆறுதல் அளிக்கும்’-நகரம் சொன்னது.

பதில் வரவில்லை . அடுத்த சில மணி நேரத்தில் உடல் அசைவும் நின்று விட்டது .

அகச் சிவப்பு அலைத்தடம் மெதுவாக கருமையடைந்தது .

நகரம்,  உடல் அகற்றும் வேலையை அதிக முன்னுரிமை கொண்டதென  வகைப்படுத்தி, மறு நாளைய மனித துப்புரவுப்பணிக்குழுவின் கால அட்டவணையில்  சேர்த்தது . பிறகு, சாலைகளில் உப்புத் தெளித்தல்  மற்றும்  உறைபனி அகற்றம் என்ற வேலைகளுக்குத் தன் கவனத்தைத் திருப்பியது.

 

ஆங்கில மூலம் : Sparrowfall : Nature : Nature Research

கதை பிறந்த கதை (கதாசிரியர் குறிப்புகள்)

மதிநுட்ப அமைப்புகளின் எல்லைகளை  ஆராய்வதற்காகவே இந்த கதையை எழுதினேன் .தானோட்டிக் கார் , Formula 1 ஓட்டுநரை விட துரிதமாக  எதிர் வினையாற்றி , களைப்பு  ,மதுமயக்கம் என்ற பேச்சுக்கே இடந்தராமல், சாலைகளில்   நெடுநேரம் இயங்கவல்லது. ஆனால் ‘ உள்ளரங்கில்  விளையாடிக்கொண்டிருக்கும் ஒரு குழந்தையின்   கால்பந்து தெருவுக்கு  உருண்டு வரும் போது அதைத் தேடி  பந்தின் உரிமையாளரும் தெருவுக்கு வருவார்’ என்றெல்லாம்  அதனால் யூகிக்க முடியுமா?

எங்கும் நிறைந்திருக்கும் புலன்சார் கருவிகள் , தன் சார்பாக எப்போதும் செயல்படக்கூடிய தனித்தியங்கி எந்திரங்கள்,  இவை அனைத்தையும் ஒருங்கிணைக்கத் தேவையான கணினி பலம், இவையெல்லாம்   ஒரு  வாழ்விடத்தை   ( நகரம்,  விண்வெளிக்கப்பல் எதுவாயினும் )  காவல்தெய்வ நிலைக்கு உயர்த்திவிடும் என்ற பாமர சிந்தனையில் சிக்குவது வெகு சுலபம்.   இக்கருத்தின்  மறுபரிசீலனைக்கு   வாசகரைத் தூண்டும் நோக்கத்தில்       விவிலியத்தின் Mathew 10:29 வாசகங்களின் சாரத்தை எதிரொலிக்கும் கதைத் தலைப்பு   (Sparrowfall ) ,  கதையின் ஆரம்பத்தில் வரும் ஆப்பிள் பறிப்பவர்

பாத்திரம் இவையிரண்டும் கதையில் சேர்க்கப்பட்டுள்ளன .

கதையில் வரும் நகரம் , மேலோட்டமான பார்வைக்கு எல்லாம் அறிந்த ,தரும சிந்தையுடைய (குறைந்த பட்சம் உதவிசெய்யக்கூடிய ) நகரமாகத் தெரிந்தாலும் , அதன் அதிகாரம் வரம்பிற்குட்பட்டது .அது  எல்லா நெருக்கடிகளுக்கும் பதிலளிக்கக்  கூடியதாக வடிவமைக்கப் படவில்லை .   நகரவாசிகள்  தாமாக முடிவெடுத்துக்கொள்ளும்  உரிமையை மதித்து   நடந்துகொள்ளும்  நகரத்தைத்தான்    நிரலாளர்கள் இங்கே  உருவாக்கியிருக்கிறார்கள் . தானே காவல் தெய்வமாகிக்கொள்ளும் செயற்பரப்புடையதாக  நிர்மாணிக்கப் படததாலேயே , அதனால்  ஒரு பெண்ணை  அவளிடமிருந்தே காப்பாற்ற  முடியவில்லை .

Sparrowfall -விளக்கம் :

ஒரு பென்னிக்கு இரு சிட்டுக்குருவிகள் என்று விற்பனை நடக்கிறது அல்லவா? இருப்பினும் இறைவனுக்குத் தெரியாமல் ஒரு சிட்டுக்குருவியும் மடிவதில்லை எனவே அஞ்சற்க  நீ சிட்டுக்குருவிகளை விட அதிக மதிப்புடையவன் -என்கிறது  Mathew 10:29வாசகம் .  தெய்வத்துக்கு நிகராக கருணை காட்டி  நிராதரவான பெண்ணைக் காக்க நகரத்தால் முடியாது என்கிறார் ஆசிரியர்

 

Leave your response!

Add your comment below, or trackback from your own site. You can also subscribe to these comments via RSS.

Be nice. Keep it clean. Stay on topic. No spam.

You can use these tags:
<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

This is a Gravatar-enabled weblog. To get your own globally-recognized-avatar, please register at Gravatar.

CAPTCHA * Time limit is exhausted. Please reload CAPTCHA.